90年代真‧經典對白 十張必備截圖！
90年代真‧經典對白 十張必備截圖！
自從某討論區興起後，截圖（Cap圖）文化就融入咗香港嘅網路世界，不過要數最經典的截圖，當然唔少得對我地影響最深、最有共鳴嘅90年代電影、電視劇，甚至卡通片，你又記唔記得以下對白的出處呢？
第十位 《大時代》 方進新
「俾次機會丫老細！」
劉松仁話你知咩叫演技，完全演繹打工仔終日憂心忡忡朝不保晚的無奈心情。去到年尾，經濟好差？會裁員？有無BONUS？「俾次機會丫老細！」
第九位 《大時代》 丁蟹
「不要怕，這是技術性調整，不要怕！」
「丁蟹效應」都係源自《大時代》，股市大起大跌果陣點可以冇秋官的Cap圖？特別是現在的股市樓市都令人憂心，呢句說話要經常提住自己。
第八位 《五億探長雷洛傳》顏同
「你大我啊？」
秦沛大哥嘅誇張面部表情、凌厲嘅眼神，完全霸氣外露。如果你老細whatsapp嚇你做錯事下年無人工加，俾勇氣給他這一張cap圖啦！
第七位 《賭神》 高進
「朋友，你返去印度食蕉啦！」
遇到豬一般隊友嘅時候，心裡自然就會浮現呢張圖。不過印度機票幾貴，又要簽證，好煩！
第六位 《喋血雙雄》小莊
「不如一槍打死我！」
同樣係發哥，都好適合形容遇到豬一般隊友時嘅心情，更適合腦細叫你做低能任務而又不可推卻之時，你一樣想起呢句對白！
第五位 《通訊事務管理局廣告》 電視機
「我覺得呢個人相當有嫌疑。」
你又知唔知「即刻轉身射個三分波」後永遠都聽唔清楚果句係乜？同埋「雞蛋六隻，糖呢就兩茶匙」外，又仲有啲乜？
第四位《社會福利署廣告》 男孩A
「其實落雨又有乜好怕喎？」
極有共鳴感嘅一句對白。細個打波落雨本來都冇乜感覺，但自從廣告播出後，每次打波先落雨果陣，腦海都會有把聲同我講「其實落雨又有乜好怕喎？」。
第三位 《魔神英雄傳》 龍神丸
「機會嚟喇，飛雲！」
而家睇返《魔神英雄傳》就會想問「點解飛雲集集都有咁多機會嘅？」。原來，這些機會其實都是屬於飛雲的。
第二位 《西遊記之仙履奇緣》 至尊寶
「曾經有一份至真嘅愛情擺係我面前，我冇珍惜。」
星爺嘅電影其實唔止一味無厘頭，好似《西遊記之仙履奇緣》入面至尊寶對紫霞仙子講既呢句經典對白，果種唏噓、悔恨嘅感覺，只要經歷過嘅人都會同意塵世間最痛苦莫過於此。
第一位 《大內密探零零發》 佛印
「好難捉摸啊！」
每次腦細對你講完一些任務與要求，心中都有呢句？每次女友嬲爆，你心中又係呢句？每次入市都會跌市？「好難捉摸啊！」連星爺睇完都忍唔住笑，真係實至名歸。
特別獎 《高達》 阿寶
「人類總要重複同樣的錯誤」
雖然阿寶係80年代嘅代表，不過無論佢嘅卡通片，抑或佢嘅對白，到今時今日仍然影響住你同我，每日睇新聞見到一班傻人的言論，蠢到一個位，你一定想起呢句。
Esquire Magazine
以優惠價訂閱一年雜誌，可獲贈精選訂閱禮品。
Subscribe
