96年英格蘭對好易通 一場比賽七個經典時刻
以前睇外隊足球賽邊有依家咁幸福，買完飛又驚球星唔嚟，再唔係派隊青年軍或元老隊過來，確實無癮。1996年英格蘭對好易通，難得齊腳，又正值回歸前一年，加上幾個經典場面，構成一場「有今生無來世」的劃時代球賽。當年你入場睇還是睇亞視呢？
難得Full Team
依家睇英超挑戰杯、英意德班霸訪港，總會見到有八九成球星會隨隊。但在90年代，幾乎隊隊本地球會都會搞外隊，請過法林明高、聖保羅、水晶宮、安德烈治等，但經常都係派啲青年軍、元老隊來作賽。1996年歐國杯前夕，英軍為了備戰，派出Full Team 來港，加斯居尼、麥馬拿文、舒寧咸、舒利亞、恩斯等球星悉數上陣，陣容鼎盛程度可謂史無前例！
作為英國殖民地，香港人都是睇英國波大的，當時你問十個有七個都是支持英格蘭的。1996年是回歸前一年，英格蘭到訪殖民地作賽別具劃時代的意義。其實早在殖民地時代，不少英格蘭球會例如曼聯、曼城、黑池、温布頓、阿仙奴、熱刺等都嚟過香港獻技，但英格蘭國家隊就是第一次。
迷信戰衣
咪以為中國人先迷信，鬼佬都一樣迷信。曼聯在1996年出左件灰沉沉的作客波衫，試過輸到半場即刻換衫。點知同一年英格蘭又出左件灰色作客波衫迎戰歐國杯，引起一堆當地球迷的負評。96年訪港英格蘭就著住這件灰色戰衣，面對粉紅救兵好易通，加上天陰陰又落雨，令英軍顯得無咩生氣，最後僅以1:0 勝出。去到歐國杯，英格蘭一直表現唔錯，分組賽更大破荷蘭4:1。去到4強對德國，英格蘭首次在賽事中著上灰色戰衣，卻不幸互射12碼階段被淘汰。係咪灰色戰衣累事，信不信由你‥‥‥
近N年最強陣容
英格蘭當年訪港如此震撼，也是因為當年的英格蘭即將舉辦歐國杯，再加上人強馬壯，大家都認為是1966年之後，英格蘭最有希望捧走大賽獎杯。睇下當時英格蘭的陣容，真係有前有後，每個位置都夠晒分量：
龍門：施文
後衛：菲臘利維利 賀維 阿當斯 皮雅斯
中場： 史東 柏列 恩斯 麥馬拿文
前鋒： 費迪南 舒寧咸
後備：蘇甘保 安達頓 韋確斯 科拿 舒利亞 加利利維利 加斯居尼 獲加 列納 羅拔李爾 柏堤
最後的戰役
講返香港嗰邊，出戰球隊是好易通，依家已經散左班了。當年香港都有不少商業贊助的球隊，例如快譯通、依波路等，當年仲會有快譯通對好易通「電子辭典打吡」。好易通的年代見證了香港足壇由盛轉衰，不少球隊缺乏贊助下，都無法再繼續比賽。
向經典球星致敬
好易通當時也有不少借將，最好笑是從愛華頓借來了守將屈臣，而當時門將希福特也是借將之一。希福特曾效力過英國不少球會，來港後迅速成為球迷的寵兒。可惜退休回國後早幾年因病逝世，令一眾香港球迷感到十分惋惜。
不精彩也不重要吧!
上面講到咁吸引，其實場波就真係幾悶，英格蘭最後僅憑費迪南的頭槌奠勝，其餘時間都係hea 下hea 下咁踢。全場最省鏡的是靚仔球星麥馬拿文，在左面不斷過關斬將成為全球的亮點。筆者當年只是坐在屋企睇亞視的直播，感受唔到現場的氣氛，真係差啲訓著。不過場波精不精彩都不重要了，一個消失了的電視台，一隊消失了的球隊，一個已歸還的地方，看著二十二個已退休的球星比賽，真係有今生無來世！
以優惠價訂閱一年雜誌，可獲贈精選訂閱禮品。
Subscribe
