80後足球世界｜中佬踢League之苦：唔踢唔知機器壞
多得這個世界有人搞League讓我們這班80後有踢波的機會。打FIFA就天下無敵，一落場就知道機器壞。從唔使熱身到熱身都會拉親，由禾仔變成加利仔，先發現自己已經不再年輕。以下 7 個情況，你地有無遇過？
熱身都會拉親
細個時候最憎啲老師叫我地熱身，嘥時間之餘，又完全唔知有咩用。大大下發現唔熱身真係爭啲，到今時今日更加唔敢唔做熱身，因為頂一下頭槌、掟個界外球、拗腰出一球波都足以令你受傷。不過最灰的一刻，都莫過於連熱身都會拉親，死未！
告別白飯魚
白飯魚一定係足球小將的窮人恩物。著住白飯魚就有如將足球、地面同隻腳三位一體，揮灑自如。不過今時今日，聽講白飯魚都要幾十蚊一對，買對波Boot都唔爭得好多。不過撇除金錢考慮，如果依家仲著住白飯魚踢波，簡直同自殘無咩分別，踢完之後全對腳每一個關節都會同你投訴。
做後備緊係唔緊要啦
細個好驚遲到要做後備，又或者猜輸左要做龍。今時今日踢League，都抱住志在參與的心態。一到半場就同隊友單聲：「踢多5分鐘換我！」。不過不幸的事總會經常發生，每場比賽都總會有隊友老婆生日、去飲、OT唔走得，搞到7個人要踢足全場。不過有時見到對手6打7甚至5打7，忽然又會覺得自己都好幸福。
由禾仔變成加利仔
好記得細個喺維園踢波，俾阿伯禁止我地快放。今時今日終於明白食塵的味道，係苦澀的！當你由一個過5個的禾確特，變成跑得慢、無速度同唔夠快的加利仔，你就會開始憎恨啲90後下下都爆你。世代矛盾咪係咁形成囉！
55 波就咪搞我
細個踢波就最憎啲朋友好錫身，見到波就避，大大下就會變成「錫身一族」。搶55波輸左事小，撞親就事大。一個唔覺意整親條頸、撞親隻手，第二朝連mouse 都揸唔到，先至係災難。所以依家踢League都係嗰句：「玩下姐！唔使咁博嘅！」
第二朝起身返工先痛苦
就算50分鐘平平安安，無俾波省親、無跌過落地下，第二朝起身你都好似俾人打左一身咁，由個身痛到落去Pat Pat。返工搭地鐵，見到個關愛座真係好想坐落去，但又驚俾人歧視，真係有苦自己知。
以優惠價訂閱一年雜誌，可獲贈精選訂閱禮品。
Subscribe
