五位球星防不勝防的屈機絕招

洛賓的軌跡

洛賓第一季來到英超便證明了自己的速度有幾犀利。左腳球員踢右邊再推向大位射波，歷年都是常用戰術，而很多領隊及後衛都早已找到方法防備。然而洛賓就懶理你覺得佢無新意，更把推大位射球昇華到去一個專業的層次，創造出「洛賓的軌跡」。作為防守球員，你就算望到洛賓的軌跡刻在草地上，你都係唔夠佢快，而作為龍門亦都無法阻擋洛賓的精準射門。「洛賓的軌跡」沒有專利也沒有隱世獨門秘方，但洛賓就告訴全世界，他爐火純青的的境界係無法模仿。

戴納手榴彈

對很多球隊來說，角球死球就係叫糊機會，如果界外球也成為叫糊機會，相信一場比賽入波的機會就會多了一倍。史篤城的戴納可能算不上是球星，早年效力打比郡及修咸頓等中型班，都唔覺佢有咁驚人的手力。2007年正式加盟史篤城後，就開始發揮其手榴彈戰術。戴納的界外球不止掟得遠，而且又平又快，令對手防不勝防，再加上界外球不受越位條例規限，令對手更頭痛。戴納接受訪問時，坦言自己在研究掟界外球場，加入了不少彈道、地心吸力、肌肉結構等科學元素一起考慮，才研發出戴納手榴彈，穩定性及殺傷力絕對不下於北韓的導彈。

祖連奴衝力射球

漫畫中的足球主角通常都有絕招，細個玩熱血足球每個球員都有必入射球，現實中都有球員懂得衝力射球。無錯C朗射衝力射球都幾有心得，但論穩定性及驚喜程度，前里昂及巴西的中場 P·祖連奴可說是佼佼者。唔單止係罰球和遠射，P祖可以在不同位置都能射出衝力射球，而龍門好多時都只能望住皮球入網或表現出一種遇到幻覺的反應，老一輩球迷一定會記得這位祖連奴！

三秒後的巴爾

今時今日，要在FIFA用速度屈機都唔係咁易。現實中的巴爾帶大家重返PS1 的Winning 年代，將舒夫真高及巴巴基達重現大家眼前。由地獄黑仔王到屈速翼鋒，巴爾最令人深刻的畫面一定是效力熱刺時對國米的戰役，簡直好似用左金手指咁，將對手後衛一一爆開。另一個經典畫面就係西班牙國家打毗戰中「傳給三秒後的自己戰術」，完完全全可以作為「潮語字典」中「屈機」的例子。不過近年巴爾飽受傷患困擾，唔知佢仲可唔可以繼續屈速這一招踢到退休呢？現代足球講求整體、戰術、機動性，在球場上表演freestyle， 贏得球迷歡心恐怕領隊會唔高興。屈機絕招好使好用，但細哨、美斯的freestyle 睇得又打得，世界杯好睇之處就係百花齊放，真係等多一年都覺得好耐！

碧咸七旋斬

「碧咸右路傳入，約基六碼點一頂搞掂！」讀書年代睇曼聯的球賽，往往不明白為何入波可以如此簡單，又總會覺得你明知碧咸係咁斬入黎，點解唔mark 實約基高爾？但當你落場踢波，你就會發現無論開龍門球、角球、罰球或傳中，只要個夠旋，你真係好難預計到個波落點，防守球員係完全無優勢可言。你從來都唔期望碧咸會有freestyle，更寄望佢唔好搞咁多野，總之一有空位或者獲得罰球機會，佢就會使出「七旋斬」或者直射罰球入網。從曼聯、皇馬再到銀河，你明知碧咸都係出依招，但多年來都係防不勝防。