7件女人未必明白的足球破事兒
點解要成班人一齊睇波?
明明屋企裝左收費電視，每個月仲俾成幾百蚊，點解班男人仲要出去同班朋友睇波？男人喜歡獨處，靜靜地一個人睇下書，欣賞下電影，但睇波就絕對一大班人睇先好玩。飲住啤酒，食住花生，打下牙骹，所得到的快樂一定唔止一場90分鐘的賽事！
重播睇嚟做咩?
當你老公坐在梳化上睇波，而佢明明喺早上新聞報道中已經知道賽果，但點解都要睇？睇足球就唔同煲劇，有人向你劇透你會好想打人，但足球就算知道戰果，都一樣吸引。看見自己心愛的球星表演腳法，見到愛隊組織水銀瀉地，見到自己最憎嗰隊由贏變輸，所以都係嗰句：「好波不妨一睇再睇！」
做咩要說三道四?
「講咁多野，你落去踢啦笨！」男人總喜歡當正自己係專家，向球員說三道四，例如笑下加利仔跑得慢、唔夠快同無速度。可能每個男人細個時候都有幻想過自己將來做球星，幾十歲時就好似費格遜咁在場邊指點江山！一切的夢都隨著歲月而幻滅，剩下的就只有喺屋企睇波！所以男人們說三道四雖然好煩，但都只是一種心理補償，各位女士懇請不要打斷我們的興致吧！
交換球衣真係好核突?
女人對臭汗水可能特別抗拒，對於球員賽後交換球衣總會看不過眼！交換球衣除左是一個紀念，亦是一種識英雄重英雄的做法。不過女士們唔使擔心，你地老公絕對唔會無啦啦踢完波同人地交換波衫，因為下場仲要著嘛！
足球真係好暴力？
「你睇下又剷到成個人飛起喇！」「訓左喺度成分鐘都唔起身，一定好痛喇！」在女士眼中，足球都是暴力的，身體碰撞多，容易受傷。但其實好多時球員的反應係比真實的情況誇張一百倍。點解？嗯‥‥都是沿自一份爭勝的決心囉！
咩係越位?
莫說是女士們，男士們甚至是球證旁證都俾現在的越位制度搞到十分混亂！但萬一另一半問到，為了顯示自己的博學，也要不厭其煩地解釋。其實女人明唔明白越位是什麼，對佢地生活無咩影響，他們最緊要知道屋企的男人有無越位姐！
個龍做咩走出嚟?
單刀橫傳係純粹腦袋問題，但單刀時龍門棄關而出就係好正常嘅事。要讓女士們明白個龍點解走出嚟其實有啲難道，我諗甚至是一條物理及數學的問題，可能要動用到一些三角幾何、角度等理論，所以都係要做一個實驗才會令佢明白出迎的意義。
射左做咩撲右？
「點解嘅點解嘅，C朗射左邊龍門做咩撲右邊嘅？」12碼一係入一係唔入依個咁玄的道理都仲可以解釋，但怎樣向另一半解釋龍門「射左撲右」咁奇怪嘅事呢？其實只有做一個實驗才會令佢明白，除非你是林源三，如果唔係當你睇到個波射去左邊先撲已經太遲了。做實驗唔使真係落場嘅，打場FIFA都可以！
男人的浪漫誰會明白?
小至規則，大則生活態度，足球這種東西真的很奇妙，往往令人摸不著頭腦！22個人在場上跑足90分鐘，最後可能連一球都入唔到，但足以風摩全球人類。足球作為世界語言，只要看得多就自然會懂，不需用說話去解釋！
以優惠價訂閱一年雜誌，可獲贈精選訂閱禮品。
Subscribe
