【未必係最好波】90年代入型入格的非典型球星

Esquire HK - YK LO
  • 2 May 2018

90 年代互聯網未普及,收費電視亦集中播四大聯賽。有些球星,可能你只曾在四年一度的世界杯睇過佢踢幾場波。雖然見得少,又未必係最好波,但這班球星總會因外型、球味及古怪招數令球迷留下深刻印象,以下一些入型入格的非典型球星,大家又有無印象?

墨西哥三寶-靴南迪斯/白蘭高/甘波斯

墨西哥三寶-靴南迪斯/白蘭高/甘波斯

94及98年世界杯的墨西哥,簡直將佢地嘅瑪雅文化帶入足球。極具民族特色的球衣加上不覊的踢法,令墨西哥國家隊一出場便充滿電影感。其中最受球迷熟悉的包括「花蝴蝶」甘波斯,長髮美男靴南迪斯及「夾波王」白蘭高。身材矮小的門將甘波斯,典型的拉丁美洲五官,襯上彩色戰衣,似跳拉丁舞多過踢波。
前鋒靴南迪斯就不用多說,頭頂腳下功夫了得,加上金色長髮,鏡頭再遠都認得佢。而佢拍擋白蘭高就更加浮誇,穿著鴛鴦球鞋,經常以雙腳夾波過人的花式娛樂球迷。

墨西哥三寶由於長時間在美洲聯賽揾食,所以球迷要睇佢地踢波,就只能等四年一度的世界杯。不過有一年的賀歲杯,墨西哥就獲邀出席,香港球迷總算有幸親身看到佢地演出。

「公羊」拿拉斯

「公羊」拿拉斯

1994年美國主辦世界杯,在此之前相信好多球迷對美國足球都不太認識。作為主辦國,美國經常揾拿拉斯做宣傳。拿拉斯好唔好波我真係已經唔記得,但永遠都會記得佢一把頭髮同羊咩鬚,再配合埋94 世界杯美國隊的星星球衣,絕對係一個經典畫面。拿拉斯大部份時間都在當時仲未發展完善的美職效力,而98年世界杯雖然有入選,但一場都無出過。雖然真係無咩睇過拿拉斯踢波,但佢又確實係令人印象深刻的「入屋」球星。

「狂人」希基達

「狂人」希基達

老實講,我沒有完整地看過希基達踢一場90分鐘的比賽,但無論你是老一輩或是八九十後的球迷,有兩個畫面你一定睇過。第一個就係1990年世界杯,在禁區外想扭過對方前鋒失敗,直接令球隊出局。嘩!喺一個四年一度的世界大賽中夠膽咁玩,真係服左佢!

點知這個並不是希基達的最後一個經典畫面,1995年友賽對英格蘭,藝高人膽大的希基達竟然以一式「蝎子尾後腳」救球,如果失敗左個波一定入龍。佢成功出招後十分興奮,但如果失敗左唔知佢仲笑唔笑得出呢?

尼日利亞軍團

尼日利亞軍團

90年代的尼日利亞奪得過奧運金牌,在94及98世界杯取得不俗的成績,但球迷見得這隊墨綠軍團最多的可能不是在真實球賽上,而是PS2 的Winning遊戲上。其實都唔使分邊個打邊個,總之就成隊都咁快,加上以前winning 都係起格,更加唔會認得佢地啲樣。印象最深刻係簡奴巴班基達、奧高查、艾摩卡治、韋斯特等球星,技術、速度、體能樣樣齊,絕對是90年代的經典。

芝拉華特

芝拉華特

巴拉圭門將芝拉華特在整個90年代都在阿根庭效力沙士菲,但00年打後曾到歐洲揾食及踢過02年世界杯,相信年輕一輩的球迷都會有印象。雖然睇直播機會唔多,但芝拉華特在電視新聞出現的機會都頗多,每次聽到伍晃榮報道「芝拉華特又入波喇!」就會知道佢招牌式的罰球又再破網。新聞片段通常都係剪佢入波,但每一次我都在想,芝拉華特有無試過射中人牆之後俾人反擊而失波呢?筆者在youtube 就找不到有關片段,唔知各位球迷又有無印象呢?
在現今講求戰術、機動和整體的足球中,咁有個性的球星相對較少見。以上這些球星睇佢地直播的機會不多,但又可能是因為睇得少而感覺更加神化。在球員生涯中,佢地未必贏盡大賽錦標,但肯定為90年代的足球歷史寫上了精彩的一頁。你地心目中又有無一些「非典型球星」呢?

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章