英超Big 6箭頭 有咩咁勁?!

Esquire HK - Desmond Chan
  • 22 Aug 2017

英超剛剛開鑼,大家的焦點照舊放在英超六巨頭身上,而焦點中的焦點,自然係某些球會高價買入的新球員。新一季中,六巨頭已有三巨頭用上全新前鋒,就算其餘三巨頭用返舊箭頭,但個個都猛料非常!英超Big 6箭頭們有咩咁勁?就同你數數佢!

盧卡古(Romelu Lukaku)

接住伊巴捧成為紅魔主力箭頭,盧卡古都可謂是眾望所歸,最起碼夠霸氣!佢自己都講:「我拎到波同開始跑,你最好避埋一邊,唔避開下一秒你就訓係地上面。」所以佢有「新魔獸」之稱唔係講玩笑,身體質素強到同異形無咩分別,大大隻有身位,米九幾高,係上季英超頭槌入波最多的第三人,而且跑動速度極高,最重要係,佢上季打破左愛華頓30年來無球員可以單季入25球的宿命。所以曼聯以7,500萬鎊高價請佢接伊巴個位,真係唔野小架,係懶左少少,成日等波到,如果佢肯追下波,應該無野可以阻止到佢入球!

莫拉達(Álvaro Morata)

唔計哥斯達,車仔今年的主力箭頭一係巴舒亞伊、一係最新以8,000萬歐元收購的莫拉達,而我相信後者會係干地最重用的箭頭。齋講來頭,效力過皇馬、祖記這些頂級球會,上季更以皇馬後備身份入波多過皇馬正選前鋒賓施馬,可想而知其攻擊力與入球能力的厲害。技術而言,人高但腳下功夫了得,扭得射得,最重要係勤力,識得回後迎波,配合中場夏薩特、柏度、韋利安等突破型高速球員,莫拉達隨時可以做埋派牌到兩邊的工作,唔會齋企等一腳劏穿式的直線。所以莫拉達的到來應該可以完美配合車仔整條進攻線,取代哥斯達的位置。怕就怕在車仔睇中十個球員,七個都踢到無晒影,費托、舒夫真高、基斯普……希望莫拉達好運啦。

拿卡錫迪(Alexandre Lacazette)

喂喂喂,手足,仲想點呀?拿卡錫迪轉會費高達5,200萬英鎊,完全打破了阿仙奴轉會記錄,攞左雲加條命架喇,仲話拿卡錫迪會係「水貨」?雖則1.75米高的他身形略細小,論身體質素、頭搥絕對唔係基奧特個皮,二傳、搶點都有待改善。但拿卡錫迪勝在短距離跑動極快,擅於禁區內捕捉機會,踢法極似雲佩斯。明顯雲加收購拿卡錫迪,是要他跟奧斯爾這類助攻型球員打組織,一腳餵入禁區,拿卡錫迪就自動埋位搵機會,機動性及把握力應該比基奧特及韋碧克更高。

加比爾·捷西斯(Gabriel Jesus)

今時今日講曼城,唔係仲講阿古路下話,大家要留意這位於上季季中加盟的超新星了,他名為加比爾·捷西斯,人稱「耶穌仔」,今年20歲,但已被細哨點名讚其是未來的世界第一,成就更可超尼馬、美斯。身材唔算柱躉式中鋒,但勝在腳法細膩到咩咁,具速度與頂級的突破能力,哥帥講到明未來就係靠佢取代阿古路,成為曼城的攻擊重心!哥帥又真係無睇錯喎,20歲仔初到英超半季,為曼城踢左11場比賽,已射入了七球,入球效率高過好多前鋒,再大多幾年,習慣了英超,仲得了?

阿古路(Sergio Agüero)

傻啦,點會真係唔講阿古路,始終佢仲當打當紮,曼城的前鋒線仍然依靠佢。阿古路的可怕在於他身型細小,卻是力量與技術型結合的前鋒,速度、搶點、走位、埋門能力、遠射等,咩都了得,除左頭搥,簡單黎講就係全攻型射手,曾當過英超神射手,又曾試過在英超比賽中,以23分鐘34秒內射入五球,紀錄到依家都未有人破到。再加上擁有六年以上的英超經驗,算是英超Big 6中最有經驗的一位射手。不過衰就衰在佢係一個容易受傷的男人,唔緊要,曼城鋒線上仲有加比爾·捷西斯!

法明奴(Roberto Firmino)

隨著法明奴於今季確認穿上利物浦「9」號波衫後,紅軍的主要入球來源明顯依重於他。原本司職中場的法明奴經高普改造後,愈打愈前,依家直頭做埋球隊箭頭,自2015年加盟到依家,兩季內攻入21個英超入球,助攻數字亦達18個,得分效率都算係咁。雖然仍有不少人批評他唔撞得、埋門觸覺馬馬地、突破能力都唔算頂級,但在利物浦奉行的高位逼搶戰術下,曾踢過中場、擁有比一般前鋒更高防守意識的法明奴就好幫到手。佢勝在聽教聽話,真係會不斷跑動緊逼對方後防搶波,上季代表利物浦出戰34場聯賽,場均錄得1.7次的成功鏟斷和0.7次的成功攔截,防守表現相當不俗。只要後防真係俾佢逼到亂晒,要製造入球絕不困難。

哈利簡尼(Harry Kane)

熱刺近年的表現真係愈打愈生猛,個個唔係咩世界球星,但都有唔錯的表現。當中的當家射手哈利簡尼把炮喇,被譽為英格蘭繼舒利亞後最全面的中鋒,射術、頭搥、走位、搶點都相當精湛。口頭無憑,講d數字嚇下你,哈利簡尼今季平均只需上陣94分鐘即能取得入球,遠遠拋離第二位阿古路、盧卡古等前鋒;而單季場均入球紀錄方面,已遠遠拋離一眾當今英超射手,與c朗、蘇亞雷斯等紀錄齊名,可見其入球能力之巨大,是以上所有射手望塵莫及。如熱刺的中場可以再加以配合,戰術有利於哈利簡尼的話,熱刺能否奪得英超冠軍,關鍵就在哈利簡尼。

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章