【今期流行古天奴】商業世界為何還有非賣品?

Esquire HK - YK LO
  • 14 Aug 2017

任何人都會有個價? 在商業世界裏,自由買賣,等價交換,有價有市就會促成交易。最近高普多次強調古天奴係非賣品,究竟係巴塞隆拿出價未夠吸引,定古天奴真係無價寶呢?回看我們的人生裡頭,你又諗唔諗到有咩嘢係幾多錢都唔會賣?

沒有替代品?

若講到有咩係無價寶,第一時間我地會諗起沒有替代品的東西。樓價翻左幾倍,但如果層樓多年來為你帶來無限回憶,住得又好舒服,還有一個獨一無二的景觀,可能真係升多幾倍都唔會賣。

講到獨一無二,有球迷認為要找古天奴的替補唔係真係咁難,唔明點解出到一億都唔放。我諗非賣品沒有永遠的,但在現階段來說,當英超球季就開鑼的時間要找個新球員又能融入球隊,確實不易。再加上古天奴在利物浦又確實有佢獨一無二的價值,在球隊落後或對方後防泊巴士的情況下,古天奴絕對有能力過關斬將,而且還有禁區外妙射的超必,所以一個能扭轉局勢的球員其實又真係幾罕有!

為何要長他人志氣?

非賣品這東西,好多時都係睇人。有啲藝術家將自己嘅作品列為非賣品,但又會賣俾一啲好有心同真正欣賞佢才華嘅人。

在足球世界裏,好多球會在選擇賣定唔賣一個球員時,除左金錢,還有其他考慮。最正路咁諗,將自己最勁的球星賣俾競爭對手,對方強左自己又弱左,絕對唔值得,所以好多時除左金錢外,為免令對手更強都係一個重要考慮。利物浦唔會將古天奴賣俾曼聯、車路士都好易理解,但巴塞會是利物浦的競爭對手嗎?雖然歐聯確實會有機會碰頭,但相信利物浦唔賣古天奴一定唔關這個原因事。

你會賣走自己的靈魂和尊嚴?

所以與其說唔賣古天奴是不想對手更強,不如說賣走古天奴對自身的影響過大。除左憂慮實力減弱和戰績下滑外,好多人都認為將自己最勁的球星賣走,等於賣走自己的尊嚴和靈魂,球迷會質疑你連最好嘅嘢都賣得,仲有無心去搞好隊波。所以同我地人生一樣,有啲野你都唔知佢值幾多錢,但嗰樣野就係代表你的icon,你賣掉它彷彿連自己的靈魂和尊嚴也賣掉。講返古天奴,賣左佢等於賣走球會的靈魂和尊嚴,聽落有點誇張。但我又認為作為一支有決心要首奪英超冠軍的球隊,而高普逐漸砌好隊波的時候,把球會最重要的球星之一賣掉,確實會有種靈魂出竅的感覺,所以利物浦今次咁堅決都係合理的。

將來賺得更多的資本

足球咁大盤生意,其實要賺一億唔係真係咁難,只不過球會願唔願意用咁多錢投資在一位球員身上。掉返轉,為左一億而有可能令成績下滑甚至失去歐聯資格,就要諗諗一億賺唔賺得過。張家輝都講,你依家無,但將來會有。古天奴絕對係利物浦的重要生財工具,上屆好多時都係靠佢絕殺贏波,再加上俊朗的外表,商業價值絕對唔講得笑。所以如果理性咁諗,唔睇眼前的一億,相信古天奴能為利物浦賺取更多個一億,又何需要將生財工具賣走呢?

有感情就會一生一世嗎?

無論如何,講到係非賣品及無價寶都好,其實當中都涉及很多商業的考慮,咁究竟在現代足球中,還會有球會因為感情而把一位球員列做非賣品呢?高普唔賣古天奴,都幾肯定唔係因為感情,但無論咩原因都好,其實利物浦可以抵擋天價都唔賣古天奴,確實係一種鼓舞。世界愈來愈全球化、貧富愈來愈懸殊,希望在可見的未來,爭勝的心可以抵擋更多金錢的利誘!

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章