Colin｜紅線音樂創辦人
- 28 Jul 2016
最近紅線音樂創辦人Gary Chan陳至仁先生不幸離世，由他一手發掘的樂隊Supper moment，觸執毛，雞蛋蒸肉餅紛紛在網上悼念，表示「多得你欣賞」。Gary最為大眾所認識的，應該是創立紅線音樂，並把Supper moment從地下推到上各大頒獎台，這正正是Gary一生的夢想… 把獨立和主流的界線變得模糊。
近期Pokémon Go大熱，創辦人John Hanke一夜成名的背後，足足花了20年的努力。而Gary要把地下樂隊推到地上，所花的年月亦不比John Hanke來得少。當回顧Gary的過去，便會了解到他如何把從前的經驗，成就今天的紅線音樂。
Gary在大學時期於理工大學讀攝影，畢業後曾於數間傳媒機構工作，包括君子雜誌，YES等。後來創辦免費音樂雜誌＜紙談音樂＞。無論當時音樂雜誌的生存環境如何惡劣，他還是選擇繼續堅持。
Mark （Gary大學同學）
我地在理工大學認識，當時佢主修攝影，但Gary在大學時期仲未接觸樂器，直至有個打鼓遊戲興起，先燃起佢對打鼓興趣，後來由打假鼓轉打真鼓。到後來畢業，我地一齊在中環開左一間小型Live house <Side B>，招呼朋友上黎飲下野，玩下音樂，聽下歌。維持左幾年時間，而佢自己果隊樂隊SIQ，其實都係Side B孕育出黎。
Randy （YES雜誌年代同事）
Gary對工作好認真！記得入YES雜誌初期，佢將過往咁多期嘅YES重新睇一次，一邊睇一邊用數據分析… 後來佢幫YES定立一個方針「無聊事認真做」。好記得果陣有個鬼故欄目，通常都係成張紙黑哂，好似好恐怖咁！咁佢發明左一樣野叫「光猛驚」，頁面要光猛但係驚，佢就係一個咁多鬼主意嘅人！
Sean（紙談音樂雜誌同事）
Gary之所以咁想推動樂隊文化，第一因為佢本身夾開band，第二係因為佢曾經在SIQ年代，有間雜誌話想搵佢地做訪問，但希望影到佢地夾band好窮，要捱麵包果一面，果刻Gary覺得外界對於樂隊有好多誤解。 而當年我地做呢本雜誌，就係想做到主流同獨立音樂嘅樂迷可以互相認識下，而最終Gary成功將Supper moment帶上各大頒獎台，佢真係做到！
Supper moment (Sunny)
早在我中學年代已經認識Gary，當時佢夾梗一隊樂隊叫SIQ，在我地心目中SIQ係一個經典，我可以用4個字形容，就係叱咤風雲。因為佢地係香港第一隊，4位成員都用彩繪塗滿全塊面咁出show！佢地個主音叫森仔，佢嘅表演係超乎想像，簡直視個台係無物，通場跑，總之可以企嘅地方都會企。我諗我嘅表演方法，有好大部份都係受佢影響。直至09年左右，我地Supper moment想出碟，而當時Gary又想開一間唱片公司，我地就一拍即合，開始左依家嘅紅線音樂。
Supper moment (CK)
我同Gary係最好的消磨時間對象，因為晚晚都會捉住對方打Rainbow 6，但佢同其他人唔同，佢表面上係打梗機，但實際上佢係諗梗野。
Supper moment (阿雞)
其實Gary唔止係我地嘅經理人，亦係我地嘅形象指導，佢成日有句金句「視覺影響聽覺」！因為最初出show我地係成碌木咁企係度，咁當時Gary就叫我地郁多d，教我地在台上面嘅走位。記得第一次影硬照，我地幾個都唔靚仔，又唔係影開，所以完全唔識… Gary就教我地點樣擺pose影相，呢d都係佢當年讀攝影，同做雜誌時候儲返黎嘅經驗，依家放返落我地身上。
Supper moment (阿達)
在2013年＜世界變了樣＞演唱會裡面，當時Supper moment嘅資金其實不太充裕，但總唔可以等到有投資者先開始籌備。於是Gary以個人名義向銀行貸款，用呢筆錢黎幫我地開show。到依家Gary離開左，我地開始接手返佢嘅工作，就發現原來Gary有好多路都幫我地舖好左，佢已經將眼光放到去好遠。
人無法走過每天
為求沒有帶著遺憾活到終點
還記得＜衝天救兵x最後晚餐＞MV的最後一幕嗎？
Thanks for the adventure, now go have a new one!
去吧 我會永遠珍惜你 直到下世紀
Gary一路好走。
