百步穿揚! 一腳劏穿的美妙長傳

Esquire HK - Desmond Chan
  • 29 Aug 2017

老實講,我覺得要交出一腳可劏穿後防的美妙長傳,真係難過Tiki-taka的打法,最基本要搵到個擅於長傳的球員已經唔容易。唔信?你打開Fifa 2017,很少有球員的Long Pass能力值可以達90以上。因為長傳講求的是天生的閱讀球賽能力與球感,唔止要一眼望穿對面海隊友的走位,更要一腳傳送出到位的靚落點,所以交得出靚長傳真係好屈機。看看以下這些長傳王的美妙長傳,你就知自己講就叻,真係要你斬球波,斬得起都當你贏!

碧咸(David Beckham)

師兄們,碧咸的長傳有幾勁,相信小弟唔需要多講,只要上網搵,就有不少長達10分鐘的碧咸長傳合集影片,球球精彩、球球到位。而小弟選擇了以上這球,來總結碧咸長傳有咩咁勁。一,落點落在腳邊,真係用手放都無咁準;二,球速夠快,如果慢點,都容易被對手看穿球路,預先閘住;三,呢球波一下子飛過三至四個對手,咁都唔算咩野,最強係茫茫人海,碧咸都仲可以望到朗拿度的走位,仲要交到落腳邊;四,個波曉轉彎,先彎過自己身前的一位對手,再彎過緊貼朗拿度的防守球員的頭頂,然後曲墜到朗拿度腳邊!短短一秒,碧咸已經計算好咁多野,再完美實現埋出黎,死未?

派路(Andrea Pirlo)

作為經典一代「中場大師」,派路交波真係「毒」到、準繩到不得了!當然,長傳都難佢唔到。佢唔同碧咸,沒有華麗的curve及曲墜線,完完全全是實際型long pass,小小的跨步助跑,個波就直飛高空,橫跨半場跌落隊友的腳邊。看看影片,派路的長傳落點真係好靚,幾乎做到每一球都落在隊友的小腿位,非常易控,難度高少少的心口位或中腰位都無,驚死你控唔住,幾咁細心,而且左右腳都交得出同樣水平的長傳先難得。

謝拉特(Steven Gerrard)

同樣是經典一代「中場大師」,謝拉特的long pass勝在夠快、夠力、夠廣闊,同樣不是靠孤度與曲墜取勝,而是腳力驚人。謝拉特的長傳很多時侯都用於進攻轉邊或後場直接交到對方十二碼點,皮球直飛隊友腳下,無返咁上下眼界與腳力,都只會睇到隊友但交唔到,或有力交但睇唔到對面海位隊友。而謝拉特最令人津津樂道的,是他的long pass不止高空波到位,連地波都交到一腳劏穿式的長傳,經常在後半場一腳地波五、六十碼地直插對方禁區,交到前鋒腳邊埋門,點解會無人截得到呢?

史高斯(Paul Scholes)

史高斯的長傳可以用震撼來形容,雖然他的長傳大部份都不會直接成為助攻,而是大轉邊或把攻撃線拉得更廣闊,但由他大跨步的助跑,到皮球飛於空中,再到落在隊友腳上,整個過程,你一定會說:「嘩,好壯觀」,那種長距離傳球的準繩、腳力,皮球飛於空中的力量,真係要用「專業」來形容!

沙比亞朗素(Xabi Alonso)

跟謝拉特及史高斯的力量型傳送不同,沙比亞朗素的長傳同樣都是超遠距離傳送,即使是六、七十碼的long pass,同樣可以輕鬆傳到隊友腳邊。即使是大半場的長傳,沙比亞朗素踢出的皮球都是輕柔易控的,但若沒有咁上下腳力,又點可以交出六、七十碼的long pass?當中需要的就是技術與球感。最重要的是,他的超遠距離長傳非常毒辣,落點永遠可以造成隊友單刀局面,直插對方心臟。試問你呢頭先係自己後防禁區頂控定個波,邊個會估到你下一腳已經將個波送到企係對手龍門口的自己友腳下,又遠、又快、又準、又毒的長傳,真係得沙比亞朗素做到。

普巴(Paul Pogba)

數了這麼久,以上全部都是已經退役之人,今天仍在踢波的球員們,又真係好難再搵到呢類型的長傳能手,不論是眼界或是準繩度,都再出現不了派路或碧咸式靚到絕,或沙比亞朗素式毒到痺的長傳。年輕一輩,普巴算是擅於長傳的一位,喜歡於後場一個直線高波餵給前鋒,或是分派左右兩邊,你說很驚為天人嗎?又不是,但勝在實際直接,落點到位。

奧斯爾(Mesut Özil)

被譽為新一代「The Passing Master」,奧燒交出的傳球真係公認靚到絕,亦是近年少有擅於長傳的足球員。他交出的長傳不論是高空波或是地面波,都不是超遠距離的力量型長傳,而是聰明地、像是有電腦分析過的,把皮球放在最絕的落點中,待隊友衝上前把球撞入。而奧燒每次交出的長傳,個波都好似識避開對手d腳或頭咁,慢慢滾到隊友腳下,而隊友只需舒服地把球撞入就是了,但可惜身處阿仙奴,無人識得接應佢d靚長傳,又可能雲加落左柯打唔俾前鋒們走位接應,如果唔係有奧燒的阿仙奴都可以輸到咁?

卻奧斯(Toni Kroos)

作為皇馬今天主要派牌球員之一,卻奧斯的傳球是無得頂的,永遠能在短時間內冷靜傳出最美的傳球,很多時候都是長傳。他跟奧斯爾的長傳風格很像,都不是走力量型,而是智慧型,偏向交出最令人意想不到的入攝長傳,落點可能無奧斯爾咁靚,但創意一流,百步穿揚,加上接應的是C朗、巴爾等頂級球星,交得差,都有佢地控得返,然後就錯覺覺得:「真係估佢唔到會咁交!」,不過卻奧斯的長傳是到位的。

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章