女子乒乓球團體歷史性奧運奪銅牌丨蘇慧音兩場單打發揮超水準丨到底佢哋三個奪獎後有咩感言？

教練李靜今場決定變陣，改由杜凱琹同李皓晴先出戰雙打年輕球手蘇慧音則要應付兩場單打，雖然杜凱琹同李皓晴先取一局，但最終以局數1：3不敵對手。

單打派出蘇慧音發揮超水準，以局數3：1勝出德國削球手韓瑩並追平場數，杜凱琹以局數3比0勝出成功扭轉局面，蘇慧音再贏單打最終以總場數3：1反勝德國，歷史性奪得銅牌。

蘇慧音喺銅牌戰被交予重任，負責兩場單打都能夠輕取對手，佢賽後話：「之前對過佢哋都慘敗，但今次真係一個超水準，喺賽前同隊友講可以輸場波，但唔可以輸啖氣，係我哋三個互相扶持得出嚟嘅結果，只要堅持，結果總係出乎意料。」

大師姐李皓晴亦喺賽後相當激動：「第三屆，我哋總於做到啦！轉全職係一件好困難嘅事，希望家長可以比多一啲支持小朋友。」

而杜凱琹今日繼續發揮穩定，佢都話：「好似發咗場夢咁，要多謝咁多位香港人支持，我哋收到好多訊息，係對我哋好大嘅鼓勵。」

教練李靜一向多金句，今日冇叫佢哋企中間啦，反而寄語年輕人：「所有事不要只有諗，要付諸實行！」

女子乒乓球團體銅牌係繼04雅典奧運「乒乓孖寶 」奪男雙銀牌後，港隊第二面乒乓球奧運獎牌。現時港隊奪得1金2銀1銅，但大家要繼續集氣，因為空手道嘅劉慕裳同凱林賽嘅李慧詩今日都好大機會衝擊獎牌啊！