唔駛簽約每月報名收費瑜伽新模式：Prana Yoga
- 14 Feb 2023
近年很多小型的運動工作室出現，其中包括健身室（如Palace Studio）及瑜伽工作室等，如果你早已經厭倦以往市場上固有的簽長約銷售形式，希望搵到唔駛簽約、可以每個月按照自己的需要去報班嘅yoga studio，或者Prana Yoga嘅模式會吸引你興趣。我們請來Prana Yoga（般那瑜伽工作室）創辦人Carmen Lam談談她開設yoga studio嘅經驗。
想知道更多關於摒棄綑綁式銷售模式的健身室資訊，伸延閱讀：唔駛簽約逐次收費健身新模式，隨選健身gym：Palace Studio
1近年來市場上多了不用簽約，可以選擇逐次收費或短期如一個月收費的yoga studio，以小班教學及小型教室的方式營運，你是怎樣看這樣的發展呢？
愈多獨立教室我覺得係對瑜伽進一步普及化就愈大幫助，多啲人認識到瑜伽帶俾人嘅轉變，成個城市都開心啲。
有供又有求，商業競爭其實係相當大，多咗收費彈性嘅選擇就係自然發展，對學習者喺嚟講就係再多一道方便之們。
2由你創辦的 Prana Yoga也拋棄以往市場上固有的銷售模式，為何有這樣的想法？ （註：Prana Yoga（般那瑜伽工作室）於2022年8月設定，並於11月正式開幕）
普遍形式係套票或月費無限上堂，都是學生自選時間及課堂種類，是相對有彈性的。
但係 book 唔到堂而維持唔到練習、去咗唔適合自己嘅班就係好常有嘅情況。
時間唔穩定對練習者本身係好大影響，尤其對初學者，係更加難建立起習慣。
我個人係唔 buy 太彈性的，太彈性根本唔係練習，而且係嘥梗學習者時間。
所以我將學習模式還原基本步，按月付選定每月日子就可以，去返學習原點。每堂都係同一組，練習內容亦可以更加有針對性。
呢種簡單方式都切合我自己性格，亦係 Prana Yoga 嘅核心：有了穩定才可成長。
每個方式無高低之分的，始終每個做法都有利弊。
3經營上的好處及壞處是怎樣？
壞處就當然是收入有限囉，每班位置有限，就係賣完即止。學生普偏都慣咗可以隨時 book 堂嘅模式而唔係選定日子，需要啲時間去教育返大家，其實穩定時間係練習任何事嘅基本嘛。
好處就係 Prana Yoga 唔使堆滿時間表而每月都可以穩穩定定。
按月報，營運成本亦相對低得多。
4成立 Prana Yoga 以來，最難忘的事情是甚麼？
只係開咗幾個月，無大事發生過啦，哈。
比較 「感動」嘅係喺場地正式開班前。
喺開班前一個月準備收生時，仲未裝修好，當時可以示人的就得個地址。
無圖、無相片、無 「新張優惠」，咁嘅條件下學生們都肯預付堂費，係完全出於百份百信任，呢份信任嘅力量係好珍貴。
亦更加睇到，大家第一目的係練習，埸地裝修其實真係唔太在乎的。
大家都只係想返去原點，想練好件事。
5面對疫情及後疫情（成了norm的時候），營運一間yoga studio的困難及優勢是怎樣？
疫情時期大家對呼吸質素及身體狀態有咗新一重要求，所以我覺得瑜伽舍係會持續有需求的。需求大，所以瑜伽教室嚟緊真係會「梗有一間喺左近」。
雖然係競爭大，但始終每個班房能容納嘅學生係有限。
個人覺得教室忠於自己嘅初心保持競爭力就可以。
定好位置、做好自己長處就夠，唔需要被教室數量嚇親，或者跟埋哂一堆唔合自己嘅模式，被市場潮流牽住個鼻行就好痛苦。
好似開餐廳咁，多啲人出街食飯你先有生意，多餐廳即係多食客，市埸熱先有得輕鬆做。
所以，煮好自己嘅食物先有競爭力，而唔係一路改餐牌改價錢。
Prana Yoga創辦人Carmen Lam
Prana Yoga 般那瑜伽工作室
地址：中環皇后大道中176A-F錦安大廈 7 樓 702 室
