那些年我們踢過的學界｜80後足球世界

19 Oct 2016

數下手指，各位80後球迷讀完中學都有十幾年，從街場跟隊、踢學界到現在Book場踢League，見證了不同階段的足球生涯。那些年的那團火，大家又經歷過幾多？

筆者中一先第一次踢真草場。在跑馬地泥多過草的球場，莫講話正正經經組織攻勢，最挫敗是連個波都斬唔起。結果尤其是C Grade 的學界比賽，大多數都係在中場混戰，觀賞指數其實都幾低。

細個睇《足球小將》，個球場成個地球咁大，跑極都跑唔完。第一次踢草場，就感受到跑不完球場的威力。在草地上的速度已經大大減慢，仲要跑極都跑唔完，真係踢半個鐘都無晒氣！

球場大，點知個龍門仲大。初中處於發育階段，C Grade 時跳高掂到條門楣都唔係個個做到。大腳解圍、中圈罰球，只要你夠大腳，每一球都係入波機會。碧咸式的半場笠入，相信大家細個踢學界都一定見過唔少！

學踢波除了要識用腳，仲要識用手。你總會見到好多手腳唔協調的球員，一場俾球證吹罰四五次掟界外球犯規。唔過頭就最常見，掟到成個跳起又有，掟掟下甩手又有，直頭掟左個波出界都經常發生。每次見到自己隊友俾人吹罰，都好想大大聲X ，但又好驚講粗口會被趕出校。

筆者整個中學生涯都是讀男校，眼見對手有一班女同學到場支持，解圍都會尖叫，頂頭槌就更加有型到震，一班和尚寺的球員心裏當然不是味兒！唔知你又記唔記得當年邊個嚟捧過自己場呢？

老一輩的80後朋友應該會知道，早期的學界不是分組賽出線打淘汰賽，而是出了線後都係要踢League！好多時就算入到第二圈，場場俾人數都要踢足四五場。之後改了賽制，有淘汰賽有12 碼，賽事緊張程度大增，娛樂性都高啲！

自己開始自己照顧後，就會開始懷念當年有阿媽幫自己洗衫！大家現在可能比較少踢真草場，踢過嘅就一定會知道踢完之後的善後工作是何其辛苦。波衫、波褲、波襪以至波Boot，全都沾滿沙石，極度難清理。今日你清都唔清一定會俾老婆鬧，但當日你阿媽會鬧你嗎？

Topic:

Soccer

Tags:

足球小將 80後