【尼馬跳糟純為錢?】6個男人轉工必諗的非金錢因素

Esquire HK - YK LO
  • 3 Aug 2017

人人都可做網絡判官的年代,尼馬從巴塞隆拿轉會至巴黎聖日耳門消息一出,有人支持佢尋求更大突破,有人斥責他貪錢、忘恩負義。尼馬轉會的主因只有佢自己先知,或者連佢自己都搞唔清楚,但作為男士一定很明白,要跳糟考慮的一定唔止金錢一個因素,客觀環境、家人、自尊、朋友及時間等都足以左右你的決定!

為咗屋企人

相信男人到左某個年紀,屋企人一定係影響你轉唔轉工的重要因素。想多啲時間陪屋企人、想屋企人生活好啲、想佢地開心等等都會成為我地的考慮。尼馬雖然只得25歲,但在不同場合中都睇得出佢好顧家。尼馬出生貧窮家庭,是典型巴西街童的奮鬥故事。爸爸為左頭家做三份工作,所以尼馬小時候踢波踢成點佢老竇係完全無睇過。尼馬透露經常都想家人生活好一點,點為之好就每個人都有唔同標準,但相信加盟PSG 會令尼馬有更足夠的資源支持家人的生活。

發揮自己最擅長角色

相信絕大部份男士工作的心態都不是有份工過下日晨就算,我們都希望有份適合自己的工作,能在適當的崗位中發揮所長,獲得滿足感。相對於在office打工,足球的角色位置就更加鮮明。唔知尼馬去PSG 會打正前鋒、左翼鋒還是進攻中場,但應該會比在巴塞時有更大的發揮空間。無錯踢波係講整體,而尼馬在巴塞經常被安排在左翼鋒的位置,多年來都交足功課,但比起佢之前踢山度士或者在巴西隊時,佢能夠走動的空間確實無咁自由。雖然唔知在位置上的發揮對尼馬來說係咪真係咁緊要,但如果我係尼馬,都會覺得在PSG能俾到我更大發揮空間。

獨當一面的野心

唔知係媒體故意煽動或是真有其事,經常都有報導指尼馬感覺到自己經常活在美斯的影子下。其中聽得最多係指尼馬如果唔離開巴塞,都唔駛旨意拎到金球獎及足球先生。而另一單聽得最多就係在上季奇蹟反勝PSG後,明明尼馬先係英雄,但大家都繼續當美斯神咁拜。當然有人覺得美斯係leader,大家都會先尊重佢,但有指尼馬因為這場戰役感覺到不是味兒。在工作場合中,想唔想做大佬就好睇個人性格,所以有時轉工,總會考慮在新公司能否獨當一面,有時候轉工可能多錢左,但又要under某某,咁不如留返喺原本公司。不過無論尼馬是否有咁大野心都好,加盟PSG 的人工高了,地位又必定超然,表面上睇都係一個正路的決定。

公司有幾重視我

有時轉工都會比較下兩間公司的前景,也會好虛榮咁諗諗做邊間公司聽落威啲。西甲作為四大聯賽,巴塞更加係世界班霸,這方面絕對是PSG比不上。但除此以外,公司對自己的重視程度都可能成為一個重要考慮。尼馬從來都係天之驕子,當年效力山度士時,山度士為左留左佢,竟然願意結束成隊女子足球隊,把資源撥歸返男子隊及尼馬身上。而今次PSG相信都付出很大的誠意,才能打動到尼馬的心。PSG向來邀請天王級球星加盟都好有方法,相信除左金錢外,也令球員會覺得他們係被受重視。

我仲有無時間去等?

尼馬今年25歲,比MSN 的美斯及蘇亞雷斯都年輕,巴塞亦都一早已講明未來一定是尼馬帶領巴塞打江山。但大家都好明白,等待的成本有時可以好高。可能公司換左老細,一切承諾都唔再存在,又或者長江后浪推前浪,好快就唔知推左去邊。在金錢至上現代足球世界,老實講巴塞已經算是一支有長遠計劃同人情味的球會了,但可能做足球員的變數真的太多,即使知道等幾年便可以擔正,也敵不過突如其來的機會。

ME

手足之情????

MSN這個組合真係為大家帶來好多娛樂。場內合拍唔使多講,場外一樣老友鬼鬼。在一間公司與戰友一起做到退休,一定係男人的浪漫,但在同一公司工作,好多時都會因工作量、金錢、權力、表現等,為一段友情增添變數。早前又有傳美斯同蘇亞雷斯夾份勸掂尼馬,轉頭又傳美斯已經unfollow尼馬同delete晒佢地啲合照,簡直好似睇緊娛樂新聞。為左友情而決定去留,一定有這些浪漫故事,但似乎今次沒有發生在MSN身上。人生苦短,足球事業更加短暫,所以足球員的每一個決定對他們來說就更影響深遠。無論如何,做所有決定,最緊要對得住自己,有時要做到完全不虧欠他人的確有點難度。最後一齊睇返MSN 在球場上的精彩演出啦!

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章