鄒凱光｜第一次同人瞓的回憶總是...
俾少少時間你，諗諗第一次同人「瞓」嘅感覺，但千祈唔好搞錯，係同人「瞓」，唔係同人「搞」，有時你會同一個人搞過好多次，但都未瞓過一次，同人瞓係指真係一齊睡覺，到醒來依然在同一張床。
我係「齋搞唔瞓」嘅忠實支持者，但其實我並唔係咁無良齋淫，不過同人瞓對我嚟講，係仲難捱過做五分鐘Plank，我有嘗試過去克服，但可能第一次同人瞓嘅不良陰影太大，形成了我下半生對同人瞓嘅恐懼。
由細到大睇咁多電視同電影，點會唔憧憬好似男女主角咁，在柔軟光滑的床單上，明月光底下相擁而睡，然後鏡頭以水波溶鏡的手法，把時空帶到早上，晨光透過雪白窗簾，悠悠溫暖著從沒有分開過的那一對，然後女方張開眼，神情帶點害羞地說了聲「早晨」，男的忍不住熱吻她……
但實情係兩個人係好難相擁而睡超過十五分鐘，首先被攬的不能無枕頭，所以一定瞓落你手臂上，比你捱到五分鐘，到十分鐘後隻手臂會麻痺到俾針拮咁，你一定會推開佢，又就算對方唔駛你手臂做枕頭，睡在你懷中，好快就發現呼吸困難，終於都係各有各瞓，而瞓醒個口臭過屎渠，可以忍受到而情深熱吻嘅人，在地球上不多！
所以「一齊瞓」其實絕對無意思，講真仲幾唔健康，但人生流流長，總會遇到有人同你講「你乜都唔駛做，就瞓響我身邊！」，我第一次同人瞓，對方臨瞓前都係咁同我講！
香港土地問題，大部份嘅人同人瞓嘅第一次，都唔會係自己屋企，有Budget就梗係出埠去台灣、日本、歐美啦，但窮如我當年嘅，就只可以入長洲渡假屋。
都係果d早上行山，下午踏單車，跟住游水，到夜晚就燒嘢食，然後……
二人瞓在床上，正當我有所行動，就聽到對方背著我說「你乜都唔駛做，就瞓響我身邊！」，我像賊人被警察大喝「Freeze！」一樣，呆了幾秒後，就投降乖乘的睡在她身旁，而事實經過一整日的活動，我都所剩無幾，所以亦都好快就「去咗」！
深夜時份，我被如泣如訴的女性哭聲吵醒，發現她不在身旁，然後見她坐在窗邊，在陰森的月影下，憂怨地哭訴著同一句說話：「你咁嘈人哋點瞓呀？！」
我嚇到彈起身，走到她身邊：「對唔住！我唔知我d鼻鼾咁勁，放心！跟住唔會再有！」，她回到床上繼續甜睡 ，而我就坐在窗邊，撐著不敢睡，怕一 睡又會嘈醒她，終於捱通頂，到船上回程時，我終於頂唔住斷了片，最後由船上工作人員拍醒我，因為她已不知所蹤，原因相信係我瞓著之後又發出巨響，搞到佢好樣衰！
自那次之後，我就對同人瞓產生恐懼，我知你一定話我誇張作大，會答我「我唔怕嘈／我有耳塞／我鼻鼾仲勁過你……」，妳唔怕又點，係我依然好怕，那陰影實在太大，大到我想成立一個「關注第一次同人瞓後抑鬱驚恐症侯群」基金，所以我需要大量「第一次同人瞓完留下陰影」嘅個案，你每一個嘅提供，都可以幫到我哋吧班活在陰影嘅病人，更加可以令我哋知道「We’re not Alone！」
又或者你同人第一次 瞓就美滿到現在，都請你留低點美滿法，再又或者更簡單，你第一次同人瞓完係開心就留A，如果Bad Trip就留B啦！千祈唔好乜都唔做，瞓響我身邊！
以優惠價訂閱一年雜誌，可獲贈精選訂閱禮品。
Subscribe
