OFF-WHITE都出聖誕波？背後是甚麼東東？
- 30 Nov 2017
OFF-WHITE x Nike的The Ten，早前搞到人人瘋狂，連劉德華都著上腳襯西裝。一條索帶，幾隻解構的字句令波鞋變得不一樣，如果將OFF-WHITE這些元素加在聖誕波之上，又有無吸引力？
相信不少讀者都已經有自己小天地，屬於自己的家，但聖誕臨近，有沒有打算佈置一下自己的家居？嫌樓下文具店的聖誕裝飾太老土？想要型格一點？你就要睇今次的介紹啦！
驟眼睇，是否真的以為是OFF-WHITE連聖誕波都玩埋？其實這是以倫敦作基地的Bootleg Bauble，用OFF-WHITE大熱的創作元素，加到一個聖誕波之上的作品。一條紅色膠索帶令人一睇就聯想得到，令它彷彿是OFF-WHITE的作品，再加上純白聖誕波波之上，就只有「BAUBLE」一字，完全玩到OFF-WHITE的那一種感覺。
老老實實，都算整的幾細緻，更加是超級限量版，只生產100個，8英鎊一個，唔算特別貴呀！我上星期於Liberty睇，隨便一個聖誕波波都5、6英鎊，買五個更可以全球免運費！
除了OFF-WHITE，Balenciaga都成為近年不少潮人的熱搶品牌，早前推出一個與IKEA Frakta購物袋極之神似的藍色皮袋，而OFF-WHITE也與IKEA聯乘創作過以IKEA Frakta購物袋作核心的大袋，轉身黃色印著SCULPTURE字樣，雖然未有賣街，但已經成為一時佳話。
就算撇除這些元素，IKEA藍色的Frakta購物袋，一早已經自成icon，我們運衫買道具，大家搬屋搬寫字樓，都隨時用得上它，絕對是潮流實用兼備，所以用來做聖誕襪亦絕對夠搶眼。
這款IKEA聖誕物唔睇得少，英國人手製作，限量只有五十對，20英鎊可以買到手，掛在客廳夠晒搶眼，跟聖誕波波一樣，總之買夠40鎊又可以全球免運，要買快手！
訂購網頁：Bootleg Baubles
