【唔該，跟隊！】街場奇趣事構成男人的集體回憶

總有人會全副裝備

學生永遠是時間成本最低的一群，放學衝去球場跟隊相信大家都試過。不論你年輕力壯，球技有多出眾，喺開波之前你可能已經成為被取笑的對象。你地有無見過著晒全副裝備去街場踢波的人呢？我就見過成套碧咸波衫、波褲、波襪、護脛甚至是釘鞋去街場踢波。
香港大部份街場都係石屎地，大部份人都係著白飯魚踢，而有人竟然全套草地服裝去踢，護脛加釘鞋已經無人敢同佢搶五五波，而你一身碧咸裝扮真係驚你剷穿見衫返屋企喊！

隊長臂章

有人嫌全副裝備未夠搶眼，竟然仲戴上隊長臂章，不過街場沒有球童俾你拖住落場，也沒有球證跟你擲毫，對方也沒有隊長跟你握手！不過都明白年輕人想當球星的夢想在香港不易達成，唯有在街場成就這個小小的夢想！

自創入波動作

細個扮球星是人之常情，但我又見過有人自創入波動作，入波後衝向角球旗跳怪舞。雖然又無咩大不了，但人人踢街場入波都係拍下手就算，你就走去搞大龍鳳，難為隊友都唔知點配合你去慶祝。

拍掌多謝球迷

球星退下火線通常會高舉雙手，拍掌答謝球迷支持。但你又有無見過街場有人退下火線，卻模仿球員拍掌答謝球迷？雖然現場得一班維園阿伯外，都沒有人也看你踢波，但咁有禮貌的行為其實又值得支持！

球場火車頭

雖然街場踢波好Causal ，但Causal 到邊踢波邊食煙又真係頂佢唔順。相信大家都遇過擔住口煙踢波的對手，又或者你自己的隊友都有咁嘅習慣 (tag 佢出嚟)。但為安全起見，大家都係唔好咁做喇！

猜龍

好喇好喇！跟左三隊，等左九個字，終於到自己落場。不過現實永遠最殘酷，就是要猜龍。無咩人鍾意喺街場守龍，但你練跑練罰球都唔會練包剪揼，命中註定你要一夫當關。做龍都算喇，最慘就係明明唔係守開龍，俾人射入左隊友竟然怪責你做咩唔飛撲！大佬，石屎地嚟架！

一分鐘輸波

今次終於猜贏唔使做龍，仲可以做前鋒添，點知一開波隊友就在後場失誤，開波一分鐘都未夠就失波。我成日都覺得打兩分先係最好玩，但無奈太多隊跟，打兩分踢兩個鐘都未必踢完，於是往往出現等一個鐘但踢一分鐘的尷尬場面。不過都係嗰句，後生的時候時間成本低，最緊要有波踢！

男人最痛

後生時踢波一定博到盡，你身上有多少傷痕時細個踢波整親的？講到男人最痛，一定是被波省中小弟弟，嗰種痛苦係無法用筆墨所形容。不過我還有一個恐懼，就是俾波省爆眼鏡，返屋企俾阿媽鬧之餘，成個星期都好像活在夢境中，看不清世界發生的事。
回想昔日的日子，有笑有淚，回頭一看，是一段永遠不能重温的回憶！各位昔日波件，你哋又有無咩街場集體回憶跟大家分享呢？