英超利物浦｜阿仙奴難成大器難阻曼城 唯紅軍才是十九路群雄抵擋藍月亮最後希望

當然目前頭幾位競爭激烈，第1的利物浦與第5熱刺只相差6分而已，但熱刺與維利終非傳統豪門，要像當年李斯特城般奇蹟奪冠，機率應如買六合彩中頭獎一樣。

而上半季一度係威係勢的阿仙奴，最近五場英超只取得一場勝仗咁大把，比水深火熱的車路士還要差，看來今季亦會延續其有頭威冇尾陣的「優良傳統」，再次錯失冠軍寶座，別忘記他們上季一度領先曼城10分最終都可以輸掉呢！

可見能夠代表十九路群雄抵抗曼城的最後希望，如無意外將再次落在利物浦身上。

始終在哥迪奧拿統治英超的這些年，就只有高普的球隊能夠打破其壟斷，於19-20賽季奪冠，而21-22賽季，利物浦亦只是以1分之差敗給曼城，屈居亞軍。要不是當年紅軍太過貪心，堅持英超、歐冠、足總盃、聯賽盃四線作戰奢想成為七冠王，導致多線作戰，那年英超獎盃早成晏菲路囊中之物……

因此，只要能夠吸取教訓，痛定思痛和壯士斷臂，利物浦要打敗曼城再奪英超絕對有可能。但何謂壯士斷臂？簡單來說就是要集中火力專攻聯賽，聯賽盃打到去四強對富咸猶自可，足總盃現在第三圈便抽中對阿仙奴，就算給你主力盡出贏波晉級卻傷了一個雲迪克，那又值得嗎？

至於歐洲賽事道理同樣，利物浦現在踢的只是歐足總歐洲聯賽(歐霸盃)，而非含金量極高的歐洲冠軍聯賽，如要走到最後 ，勢必影響到聯賽部署和球員發揮。為了一隻食之無味，棄之可惜的雞肋，卻損耗了英超大好爭標前景，當中權衡輕重，高普一定要弄清楚。