亞視2018年一月復活?到底會有甚麼節目?

Esquire HK - Park Chan
  • 10 Nov 2017

相信《賭俠1999》張家輝這一幕天台之上,大叫「仆你個街呀!亞視嚟嘅喂!」已經成為經典,而最經典的,是亞視好像永遠不死,至去年4月正式停台後,我們以為一切只會寫入歷史,怎料有傳下年一月,亞視將會回歸,真係亞視永恆呀!「亞視嚟嘅喂!」肯定會再次成為熱話!

亞視於2016年4月正式結束廣播信號後,藝員各散東西,但有不少當日亞視的花旦小生,全都過檔無綫,幾乎每套劇集都會好像見到舊日亞視的味道。至今一年半左右,也曾有傳亞視會回歸,但是大家都一笑置之。不過,近日這消息又再度回歸,因為據報導,亞視現時的大股東協盛協豐持股超過一半,當他們於今年處理完畢亞視債務之後,亞視就會正式回歸!

如果你有時間,不妨之後搜尋一下亞視的官網,寫到明「Coming Soon」,網頁更十足十蘋果官網,放了幾部tablet及手機,似乎指明了發展的方向!

據指亞視將會透過「OTT」(Over-The-Top)的網絡電視方式營運,你將來可以下載ATV的app收看,又或者利用外置機頂盒,一如今天的MyTVSuper,接駁電視收看,是否收費電視仍然未知,而到底收錢有無人睇都係問題!(唔收錢有無人可能都係問題?)

魚樂無窮

如果亞視回歸,我強烈要求亞視將《魚樂無窮》復活,因為我是睇《魚樂無窮》大的,從以前的極低解像,一路睇到高清播放,成個魚缸清晰晒,條條魚都咁清楚,幻想一下,今時今日如果用4K播住《魚樂無窮》,已經魚缸都不用買!

百萬富翁

《百萬富翁》是亞視近代最受歡迎的節目,連無綫都不得不跟風,玩這類遊戲節目!而陳啟泰亦因此爆紅,成為ICON,見到陳啟泰,腦海中就會有聲,那首背景配樂就會奏起,而對白肯定係:「最後答案?」

不過,如果2018年之時,亞視要再搞《百萬富翁》,應該要《千萬富翁》才有吸引力了吧?因為今時今日的香港,一百萬是首期都不夠的金額!

《方太煮乜餸》

亞視復活之時,我覺得《方太煮乜餸》一定要打頭陣,早前《鼎爺廚房》爆紅,大家都知道家有一老,如有一寶的重要性,所以將《方太煮乜餸》放在黃金時段推出,肯定都會爆紅,信我!一定係,除非唔係!

《我和殭屍有個約會》

計我會,於《我和殭屍有個約會》面對,《Twilight》真的不算甚麼,《我和殭屍有個約會》神奇在將中國傳統殭屍、歐洲殭屍、滿天神佛集中在一起,簡直就是超時空的神作,若然變做電影,肯定係史詩式電影!所以,如果亞視重生,一於將《我和殭屍有個約會》變到《The Walking Dead》咁,不停推出新季度去拍,如此這般,亞視永恆,其實唔難!死,愈講愈期待下年一月呀!

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章