睇到手心冒汗的熱血運動漫畫

Esquire HK - Benjamin To
  • 14 Jul 2017

男仔最鍾意睇漫畫,愈熱血、愈Like;而講到熱血,除咗王道漫畫,運動漫畫亦係長青不死嘅系列。少年時睇會覺得有股衝勁,中年時睇會添一份感慨,大概大家鍾意睇嘅,其實就係為咗搵返嗰份主角或主角們為咗爭勝而揮灑血、汗、淚嘅青春。以下幾套經典嘅熱血運動漫畫,邊套最激盪到你嘅內心?

《光速蒙面俠21》

《足球小將》、《網球王子》、《H2》等都係運動漫畫嘅經典中嘅經典,不過睇運動漫畫,有時候更追求一份手心冒汗嘅緊張刺激感,而頭腦與力量並重嘅美式足球正係最完美嘅演繹。《光速蒙面俠21》是以美式足球作為題材,由於非常講求團隊合作,對各個隊員嘅角色描寫亦毫不馬虎,位位都獨當一面,或是頭腦、或是力量、或是速度、或是技巧,集輕鬆、熱血、緊湊所有王道元素於一身,遺憾係未能於最完美嘅時候完結,反而變成爛尾之作。另外,咪以為主角都係強大完美或熱血上腦,《光速蒙面俠21》入面嘅主角小早川瀨那就正正係完全相反嘅一個例子,身材矮細、性格懦弱,驟眼睇落根本唔係主角嘅材料,不過正因為佢弱小,先對強大有更熱切嘅嚮往,往往係最重要時候,都可以發揮出比其他人更大嘅威力,熱血度即時乘二。

《我要高飛》

體操於香港並唔流行,不過呢部漫畫或動畫於當年亦曾一度掀起體操嘅熱潮。其實作為日本體操運動員,既冇中國從小就開始嘅地獄式訓練,亦冇外國人先天嘅身型優勢,不過近年體操於日本亦發展得有聲有色,某程度上亦展示出運動員對運動嘅一份熱誠。《我要高飛》就講述一班於日本各中學選拔出嚟嘅學生,從校際比賽走到世界奧運嘅大舞台,並無過份花巧嘅特技招式,勝在夠貼地寫實,真實反映體操運動員有血有淚嘅故事。值得一提嘅係菊田洋之只係負責《我要高飛》嘅作畫部份,而原作者為森末慎二,曾於84年洛杉磯奧運中,以20分奪得單槓金牌,而雙槓動作「森末」更係以佢嚟命名,絕對係含金量十足嘅一部漫畫。

《火之丸相撲》

講到格鬥漫畫,大家第一時間應該會諗起矢吹丈,或長壽漫畫《刃牙》,甚至近年拳拳到肉、超爽快嘅《拳願阿修羅》,不過我反而想推介另一套名為《火之丸相撲》嘅漫畫,首先以相撲呢類比較冷門嘅題材,正合本人貪新鮮之人嘅口味,可以認識到相撲嘅規則之餘,亦順道一睹呢項日本國技背後講求心技體合一嘅精神,並唔只係兩名胖子喺度赤裸裸角力咁簡單。而故事另一吸引設定,好似《光速蒙面俠21》或《破風弱男》咁,以一個根本體格唔入流嘅人為主角,不過主角潮火之丸與前兩者有些少唔同,佢既冇體格,亦無天份,只係單憑一份強大嘅心,以努力去彌補技與體嘅不足,甚至足夠挑戰本身擁有天賜體格及天份嘅神人,當然有主角光環加冕嘅情況下,或者某部份嘅劇情係誇張失實,不過呢份激情確實人如其名,好似火一樣咁激盪人心。

《男兒當入樽》

講到《男兒當入樽》,其實亦無需要多講,就算之後有幾多套籃球漫畫,都始終冇一套可以取代到《男兒當入樽》嘅地位。以山王一役作為結尾,到底係咪爛尾?講足咁多年,有人覺得唔夠喉,亦有人覺得見好就要收,不過反正呢場絕對係代表整套漫畫最熱血嘅一戰,呢點係毫無疑問,反而值得討論嘅係,呢場經典嘅賽事你又睇過幾多次?

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章