【鄒凱光專欄】一件全城盛事，到底有幾多人真的能投入？

到屯門三聖吃飯，隔離枱應該是外國親戚回港向健壯爺爺賀壽，席中年輕的ABC 男孫，觀其街頭打扮，絕對理解他全程重覆追問家人：「Can I go to the Tamar Park by myself ?」

家人多次拒絕，男孫鍥而不捨，爺爺見孫仔有點情緒，遞上可樂欲氹他開心，卻被孫仔無情拒絕，爺爺扮氣憤質問孫仔：「why要去Tamar Park呢？」

男孫給爺爺看Kaws巨型形飄浮公仔的照片，然後乘勢再扭計，要爺爺帶他去，爺爺哈哈大笑：「我以為你扭計要睇咩，想睇浮屍呀？!後面蝴蝶灣成日有得睇啦!夜晚釣魚跣腳跌落海浸死，浮番上嚟時，大過你果隻屙屎公仔啦!」

確實爺爺講完之後，男孫無再嘈吵要去睇Kaws，但轉而煩住阿爺要睇浮屍！

巴士上一對情侶

女友：「幾時去Kaws打咭」

男友 ：「吓？!未逼過呀？!」

女友 ：「未現場睇過呀？」

男友：「妳過嚟我公司，收工時浮屍、僵屍、喪屍…AB屍任揀」

女友：「想去襯下熱鬧，你份人係咁無情趣……」

男友： 「黐膠紙!唔去逼叫無情趣？！家吓舒舒服服遊吓車河好正吖，係妳冇情趣啲咋！」

我支持男友的每一個字，但佢女友同我睇法唔一樣。

經過咗十幾分鐘冷戰後，男友終於認輸轉mode，恰熟狗頭咁同女友講：「我哋轉頭食完嘢，就過去睇吓啦……睇吓有幾勁都好呀！」

朋友谷中，由個別朋友雀躍地相約一起去觀看，發展到因個別朋友沒有回應，被追逼兼順勢批評其為人被動冷漠，被批評的還擊無限放大，把浮屍論引伸至根本是香港人目前面對的景況，沒希望，沒出路，躺著等死，其實一早已經死去，香港人看什麼都負面，有機會就放鬆下啦！

潮流物像閃電行雷，瞬間耀目吸引，然後緊張地等雷動出場，過後大家都要交出不同反應，有人逞強，有人恥笑，有襯勢show off，有人借題發揮，而大份人其實從未關心過

「咩最大吹氣公仔？咸濕嘢？」