【鄒凱光專欄】兩個人最緊要sync到

Esquire HK - 鄒凱光
  • 20 Mar 2017

Smartphone與電腦的資料sync到好重要,而其實兩個人走在一起,兩個人sync到更重要,但偏偏,生活中經常遇到的,都係sync唔到的人。

友人K小姐最近失戀找我訴苦,面對失戀而且是被拋棄的一方,最佳安慰方法,是齋聽唔答!幾小時的苦水,都是千篇一律,不停問點解,問得最多是分手原因,但其實當事人都知道原因就只得「唔愛妳喇」一個,不過明白原因又不代表可以接受真相。

「佢口口聲聲話唔可以同我走落去,我問佢咩原因,佢講極都講唔出,終於佢話我無睇過佢最鍾意果本書,同我好難Sync到,咩星呀?!那星呀!點解呀?!」

K小姐話自己從不愛看書,已經為了他強逼自己去閱讀,但他那本從論語體現聖哲典範,能夠看完一個章節,都已經超越了她的能耐,她都只是不想扮虛偽,就算勉強看完全書,亦都不會明白箇中道理,所以才中途放棄吧!但至少她就努力去嘗試,點解其前度沒有體諒她的苦心?!

我終於忍不住開口了:「所以佢咪話同妳唔Sync囉!」

所謂Sync,即Synchronize「同步」,跟一個人相處要Sync到,要有共同的「話題」、「 喜好」、「 價值觀」、「生活品味」、「人生態度」才可以把兩個不同的 東西Synchronize到同一的國度上!別以為可以一起就代表走在同一頻道上,有時只因為荷爾蒙作祟,才令兩個陌生體走在一起,那種是生理需要,直至某一刻你們因為一本書、  一首歌、  一部電影、甚至一單娛樂新聞,才終於發現大家原來完全唔Sync,又或者相反,你因為這些東西,發現原來跟某人好Sync!

認識過一對感情要好的夫妻,妻子突然愛上了某女子, 坦言終於找到共同國度的人,向丈夫提出離婚,丈夫苦纏不果,最後毅然放手,臨行前忍不住問:「究竟妳同佢有乜嘢咁Sync?」「我第一次去到佢屋企,發現佢書架上有九成嘅書,同我書架上嘅係一樣!而呢啲書係你從來無留心過……」

有些人認為一起之後,大家都可以有自己的空間做對方興趣的事,美其名叫「自由」,但如果倆人興趣是同步,做什麼都是同步一致,再不是你不情願地去陪對方,這樣的關係才是最令人嚮往,但可惜大部份的我們,都是遇不上同步的人,只苦忍遷就身邊那位,甘願違背良心, 投其所好去迎合對方,以為這樣就可以同步,但凡事不夠真誠意,又點會做得好,可能效果比沒有做更差,終於無法Synchronize,還 Jam到亂晒,然後發現根本唔啱Key,其實大家是 「汪青奴」,感情損傷不止,浪費了大家的光陰,才是害人害己。

所以若及早發現和對方唔Sync,就可以及早找回時間去追縱和你青奴相同的人,人生苦短,歲月無情,及時行樂才是最重要!


為己為人,唔Sync就及早放人!

Loading...
YOU MAY LIKE
訂閱Esquire接收最新男士資訊及禮遇
Sign up FOR ESQUIRE_PAPER NOW!!
下篇文章