【葉浩文專欄】要破釜沈舟才可完創業夢

Esquire HK - Kirk Yip
  • 13 Apr 2017

如果你有一天想創業,你身邊的人可能以為你在痴人說夢,因為大家都認為,今時今日香港莫就只想尋得安樂蝸都已極樂,也別說創業了。但是,如果沒有破釜沈舟的勇氣,創業是不會成事的,而且,今時今日你有網絡,搞初創是Concept is King的世界,隨時比你想像中更值錢。

最近一單本地新聞吸引了我,正當不少香港人捱更抵夜為上車,一個八十後青年卻孤注一擲,賣樓去完成創業夢。皇天不負有心人,經過幾年努力,他所創立的旅遊產品預訂平台Klook,成功吸金超過2億港元,一個千萬富豪就此誕生。明顯地他是看中了中產家庭旅遊帶來的商機,近年亞太地區年輕新中產數目持續增加,這批人消費力強,相關行業理論上應有不俗發展空間。

有青春有時間,有乜嘢好怕

初創企業投資風險高,成功率一般是2%至5%左右,代表投100間此類初創公司,大概只有2至5間可以成功起步,做到有增長或盈利。但高風險亦可能帶來高回報,以往不少成功例子都可為投資者/始創人帶來數十倍回報。例如,大家熟悉嘅團購網站Groupon香港,佢嘅前身ubuyibuy.com,都係有一班後20出頭生仔夾錢創出嚟,而當中幾位founders亦係我嘅好朋友。所以,我贊成年輕人放膽創業,人越大,顧慮越多;年輕人opportunity cost低,失敗可以重頭來過,又有甚麼可以輸?

Concept is King!

冇錯,「Cash is King」,但今時今日我更相信「Concept is King」,尤其是在初創世界,一個可以改善大家生活模式嘅概念,價值隨時可以係億億聲。近排我睇咗份研究報告, 分析過去6年內成立 的五萬多間初創公司,發現受投資者垂青嘅Concepts,共通點都係在不同層面上令大家生活上得到改善。 對我嚟講,經常在網上做投資買賣,防止我比黑客詐騙嘅網上智能保安防偽技術,真係非常重要。 另外,令我可以簡單用手機拍張相就search到資訊嘅影象辯認技術,真係大大提升咗我嘅工作效率。咁好嘅concept究竟有幾值錢,畀兩個例子大家睇下。

初創吸金王- Quanergy Systems及Meta Company

LiDAR (光學雷達) 感測器及軟體生產研發商Quanergy Systems成功捉緊了無人駕駛, 自動導航,實時定位及高度精密地圖的發展趨勢,運用LiDAR(光學雷達)技術研發出一系列產品,廣泛應用於運輸、導航、測量、安全、航空、礦業、農業、工業自動化、智能家居等多個領域。由於傳統雷達使用無線電波,而LiDAR使用激光射線,大大提升了測量物體距離和表面形狀精準度,為行業帶來了革命性的改變。Quanergy Systems總融資額高達1億3千萬美元,平均每167日就完成一輪融資活動,吸金量絕對冠絕全球。

另外,Augmented Reality  (簡稱AR 擴增實境)革命性將真實環境和虛擬的物體無縫銜接, 除去年令Pokémon Go極速爆紅外,我認為AR嘅應用在娛樂、製造業、通信媒體、醫藥、教育、遠端協助和3D建模等領域會越來越多。自2014年推出第一套AR系統後,Meta Company 至今嘅總融資額已達9900萬美元,吸金量僅次於Quanergy Systems。

如果有concept,但冇資金又可以點? 其實香港有不少組織支持本地創業,例如有數碼港培育計劃。受培育公司除了獲數碼港全方位創業支援外,更可在24個月培育期內獲發最高港幣$33萬財務資助。有諗頭嘅你,唔好嘥咗呢啲機會啦,快啲動手寫下proposal。鍾意嘅話,都可以搵我分享下。

Loading...
YOU MAY LIKE
訂閱Esquire接收最新男士資訊及禮遇
Sign up FOR ESQUIRE_PAPER NOW!!
下篇文章