【英國移民生活分享】英國菜可以有幾難食？住在美食沙漠的生存法則

正宗嘅英國美食係咩？好多人第一時間都會諗起Fish and Chips。呢度幾乎每個鎮都會有幾間賣Fish and Chips嘅舖頭，間間都會自吹自擂有幾多年歷史，甚至話自己賣嘅魚係全英國最好！

但係我哋試過好多間亦都中過好多次伏，可能英國人啲味蕾真係唔同構造，所以佢哋會覺得好好食，但我哋就會覺得香港好多餐廳都整得好食過佢。唯一一次覺得好食嘅，係去到肯特郡海邊小鎮Whitstable嘅一個街邊檔口，先至食到真正外脆內軟、入口爽脆、色香味俱全嘅炸魚。

本土英國人好鐘意食Shepherd's pie、cottage pie等各類所謂嘅「批」，其實只不過係啲薯蓉同肉碎加埋啲醬汁嚟一齊焗，然後加返啲青豆同配菜就一整碟上，就咁聽落已經唔多開胃，食落就更加覺得只係啲毫無烹調技巧嘅下攔菜式。

有啲人話嚟到英國好淒涼要捱薯仔，係錯嘅，因為無論牛肉好羊肉好，點都有啲配菜俾你嘅，不過你只能夠當佢係英國碟頭飯，唔趕時間可以坐低食，好過拎食份超巿買嘅Meal deal邊行邊食。

英國買肉其實好平，但唔知點解英國廚師對於肉類嘅烹調方式真係乏善足陳。有車嘅朋友一定知道Miller & Carter、Beefeater、Toby Carvery呢幾間連鎖式餐廳，佢哋通常開响郊區比較容易泊車嘅地方，外面望入去好似幾高級，其中Miller & Carter同Beefeater主要係食牛扒同漢堡，味道都算唔錯，但係食多幾次你就會發覺原來食來食去都係呢兩樣嘢，而且其實牛扒係可以響屋企自己煮嘅，漢堡都一樣可以，同埋嚴格嚟講呢兩樣都唔算係英國菜。

至於Toby Carvery就更加令人失望，佢係半自助餐形式，落咗柯打之後每人就自己攞自己隻碟出去拎熱盤，形式似香港酒店自助餐，可以响牛、豬、羊幾種切肉中自由選擇，不過份量係限定嘅，只有配菜係任拎。至於味道？我地食過一次就冇去第二次囉。

葉師傅同導遊珍一向都好疑惑，點解英國咁多地方咁近海邊，但點解本地人好似唔多鐘意食海鮮？呢個問題至今都未搵到一個令人滿意嘅答案。事實上，你响英國任何一個內陸乃至沿海城巿，响Google或Trip adviser搜尋「Seafood」呢個關鍵詞，結果都會令你相當失望！

因為無論係評分幾好嘅餐廳，都只係供應煎魚、煎蝦、煮青口等基本菜式，好彩嘅話，你可能會食到新鮮生蠔、海鮮拼盤、西班牙炒飯……等非英國本地菜色。所以當我哋真係好想好想食海鮮時，就唯有去超巿或者海鮮檔買返去自己煮，或者幫襯一間叫Burger & Lobster嘅連鎖式餐廳，佢嘅原隻龍蝦同埋龍蝦包，都係值得一試再試嘅。

嚟咗英國咁耐，我哋早已經磨練出一身烹飪功夫，所以平時冇乜必要都係留响屋企煮飯仔，起碼可以食到正宗碟頭飯、肉燥飯、車仔麵、譚仔米線……如果要外出用饍，都會盡量揀返亞洲菜。响英國大城巿如倫敦，亞洲菜嘅選擇非常之多，無論廣東酒樓、四川火煱、日本刺身壽司拉麵、韓國燒烤、泰國菜、印度菜、越南河粉，水準亦都唔差。如果搵唔到亞洲菜，退而求其次都可以幫襯意大利餐廳、墨西哥餐廳、地中海餐廳等等。住响大城巿畢竟就有呢個好處，唔使淨係得Wetherspoons呢類地道英式酒吧餐廳選擇。

不過，正宗英國菜之中都有一個值得我欣賞嘅菜式，就係Full English breakfast，因為真係好抵食，無論係邊間餐廳水準都唔會差(其實可以有幾難食呢？)，而且朝早又難得有啲熱嘢到肚。所以，英式早餐可以話係我最推薦，亦都係唯一推薦嘅英國美食。