【英國買樓】移民英國置業要注意的5大事項！有甚麼你必定後悔的幾種「陷阱」？

首先，買英國樓最重要當然係留意物業究竟係Freehold(永久業權)抑或Leasehold(有限業權)。雖然好多人都知道Freehold樓會比Leasehold樓好，因為業主唔使俾地租，轉手時手續比較簡易，不過由於大部份舊式嘅Apartment都係Leasehold，所以好多時都唔由得買家去揀。

而對於目標買Leasehold樓嘅買家而言，反而最需要留意物業嘅租賃年期不應少於70年，因為銀行好大機會唔批按揭俾你，同埋業主响短期內都要為延長業權而支付一筆數目不少嘅額外費用。

第二，水浸係英國樓好經常遇到嘅問題。雖然買家可以响網上查到物業係咪位於高風險嘅水浸區域，而且測量師响驗樓後都會對此提供詳細報告同埋建議，但原來响實際操作上仍然未能完全避免相關風險。

我哋有位朋友最近買咗一間响低水浸風險區域嘅排屋，驗樓報告亦都表示間屋冇乜問題，但佢哋收樓後到咗第一個雨季已經見到地板同牆身發漲，然後發現地基底部積水。

原來佢地買入咗一間「化妝樓」，而驗樓時啱啱適逢旱季，所以咩都驗唔到，最後被迫增加裝修預算，而且最後亦無法完全根治雨季時嘅水浸問題。

就算物業結構本身全無問題，响英國都可能因為一棵草搞「彎」成單交易。原來英國有一種生命力極頑強嘅野生植物名為日本虎杖(Japanese Knotweed)，呢種植物原本响19世紀由日本引入歐洲作為觀賞植物，但由於佢嘅繁植能力強，同埋可以响惡劣條件下生存，植物根部甚至可以穿透房屋嘅牆身同地板，令到房屋滲水及結構遭到破壞。

所以睇樓時唔好見到一切綠色植物都表現得興奮，因為日本虎杖極難被消滅，會令樓價平均跌5%，銀行亦可能因為呢個原因而拒絕對買家批出按揭。雖然有條例要求賣家要向買家聲明物業範圍內是否存在虎扙，但弔詭嘅係，賣家亦都可以回應一句「唔知道」嚟逃避責任，最一切風險推返俾買家。

另外，有部份物業嘅潛在問題唔單止測量師搵唔到，就算成交後當交買家已經遷入咗一段時間，都未必會發覺得到。我哋有個朋友兩年前買咗間質素好好嘅排屋，雖然已經有成一百年歷史，但裡裡外外都保養得好理想，仲有一個由上手業主打理得好靚嘅後花園。不過當佢哋搬咗入去半年後，有一次經過一場大雨，花園正中央竟然出現地陷，深度竟有一層樓咁高，好在冇人受傷。

佢哋初頭百思不得其解，又驚水土流失，又驚會影響埋房屋結構，後來問吓隔離已經80幾歲嘅鄰居，先知原來呢間屋嘅花園地底原本有個防空洞！所以應該係個防空洞因為日久失收，遭逢一場大雨就塌咗落嚟！

原來，英國政府响二戰期間曾經大力鼓勵居民响自己屋企興建防空洞，但係經歷咗大半個世紀後，房屋經幾易手，好多業主都唔會知道自己屋企收埋咗個防空洞，而測量師亦唔會無端端發現得到。不過好彩嘅係，呢啲防空洞雖然歷史悠久，但多數唔屬於受保護建築，業主有能力嘅話，可以將佢維修、翻新並改建成地窖，資金緊絀嘅話就唯有花少少錢搵工人用泥頭填咗個窿就算。

至於部份香港人最擔心嘅問題，放心，响英國嚴格嚟講係唔會有凶宅嘅，呢度亦唔會好似香港咁有個所謂嘅「凶宅網」，因為英國人一般都唔太在乎間屋有冇死過人，尤其係過百年歷史、住過幾代人嘅房屋，死過人真係一啲都唔出奇，而且本地老人亦的確係有响屋企過身嘅傳統。

因而所謂嘅「凶宅」，係唔會影響樓價同租金。對於香港人嚟講，唔好問就當唔知，自己住得心安理得咪算囉。