醉酒、撞車、發爛渣！一人一個的士夜驚魂

的士司機都飲醉— Polo

先講我自己的親身經歷，「有一次夜晚，一上的士我已經聞到成架的士都係酒味，我以為係上一手乘客，第一次講我去邊，司機好似冇乜反應，講多兩次佢先有反應。一開車就知道出事了，佢揸車係完全冇行過直線，見到紅燈就老遠已經停車，見到綠燈又唔識開車，完全判斷唔到距離，好彩果晚條路冇車炸，咪我已經命喪的士上面。」

司機狂講淫野 — Desmond

「有一次我同同事上車，兩個年輕男子一齊搭的士，司機突然之間自己喺度開始講咸濕野，『喂，後生仔，唔好話我唔教正你啦，記得打飛機果陣，打好啦，千祈唔好射呀，損陽氣呀』，我哋即刻拉開其他話題啦，但佢都係停唔到，繼續講話要知你哋血氣方剛，但一定要留返俾你哋另一半呀，我哋即刻兩個扮傾公事，就冇再聽佢講野。」

嫌近發爛渣 — Karen

「我趕住去Event，咁我就喺時代廣場去太古廣場，其實都唔近，但可能司機大哥排得太耐啦，佢一聽到已經喺度口嗡嗡，之後一出軒尼詩道，佢就即刻踩地板油，去到紅燈就最尾先煞車，chok到我哋就嚟嘔，我朋友就：『我想嘔，可唔可以慢少少。』，佢就冇理，最後我只可以扮：『司機，我大肚啊，可唔可以慢少少』，司機咁先肯屈服。」

架車有曱甴 — Connor

「果次講起就經典啦，我未見過一架的士咁污糟，果次我真係好趕時間，截咗好耐都未有車，咁就唯有上車，一上到車我已經見到車頭放住幾枝淡黃液體嘅水樽，我已經知道中伏，然後就發現後面全部都係舊報紙，我已經縮埋一舊咁坐，之後我就見到喺後座冷氣到慢慢走出隻曱甴，係大果種呀！我即刻叫路口有落。」

差點出意外 — Anton

「你知香港嘅道路幾繁忙嫁啦？！每一個司機都想快啲cut到線，每一個司機都唔想俾人cut線，所以成日都險象環生，有一次只係差5cm就喺個十字路口度撞車，大家都唔讓，大家一齊衝出去。」

最終同大家講返，這些都是我們極少數遇上的經歷，其餘大部分的士司機大哥都是非常優秀，祝各位司機大哥出入平安，路路暢通！