今季轉會市場最令你震驚的事

尼馬成為史上最貴球員

相信這一季最驚為天人的轉會清息，絕對是巴塞主力之一尼馬決定脫離大哥美斯的陰影，出走巴黎，要在PSG做大哥。大家都覺得踢得好地地，突然離開巴塞已經窒一窒，仲要去到次一級的法甲踢波直情呆左。其實說穿了，咪又係錢作怪，尼馬高身價、貴人工就預左，但睇真d，原來以2.22億歐元被PSG收購，睇見呢個數字，直頭下巴都跌左落地。這個數字令他馬上成為史上最高身價球員，但尼馬喎，勁係勁，但呢個價錢、呢個朵，又好似唔抬得佢太高。不過唔好理，PSG不知幾咁愛尼馬，仲驚死人家加盟後做唔到大哥又話要走，專登出百萬歐元叫卡雲尼唔好同佢爭主射十二碼，則係暗示叫卡雲尼唔好同尼馬爭做大哥，邊有人想做大哥出面到咁架？醜死怪！

PSG搶走皇馬心頭好

轉會窗未開之前，已經有好幾間大球會講明會爭前摩納哥超新星——基利安洛天，但呼聲最高的還是皇家馬德里，皆因領隊施丹親自邀請基利安洛天參觀皇馬總部，又向佢講明未來的路向，又話多多錢都會買佢返黎，曾傳出皇馬會以近億歐元收購此子。而基利安洛天聽到係皇馬喎，又可以同偶像C朗做隊友，點拒絕呀？整件事根本就是姣婆遇著脂粉客，以為一定成事，怎知整個轉會期，一直都等不到皇馬成功收購基利安洛天的消息，最後等等下更變左係PSG出古惑，以先借後買的形式收購他，借完一季就會以1.8億正式收購……又係PSG，又係錢，真係點估到呀？今個轉會市場，點估到PSG先係最狼個個。

竟然係迪比尼做尼馬接班人？

好喇，尼馬要去PSG做大哥已成事實，真空了左翼一陣子的巴塞，究竟會買咩人填補這空缺呢？話晒上一手係尼馬，技術、名氣都要有返咁上下先接到班，而這方面我們絕對不擔心巴塞，賣左尼馬有一大筆錢，巴塞那「地上最強」的朵又響，絕對唔慌搵唔到猛人加盟。那時候，我們一直等待著消息，有人說是熱刺超新星阿里、係車仔踢到曉飛的夏薩特，而呼聲最高的，就是尼馬同鄉、利記主力古天奴，搞了好一排，最後結果出黎了！巴塞以1.05億歐元在多蒙特效力、只有20歲、以速度及盤扭技術著稱的奧士文尼迪比利……有的球迷更問：「邊個黎架？」。最過癮的是，人人都在質疑過億買這個實力有待肯定的20歲小子是否正確時，開季一個月，迪比利便因拉傷大腿肌肉，休息三至四個月……

雲加竟然肯洗錢

其實每季阿仙奴都會是轉會市場的焦點之一，只係大家黑心腸，唔係想睇佢買咩勁人，而係要笑雲加又唔肯買人，佢肯買人大家反而失望，因為無野好笑。今季雲加怕左你地班友，插左佢咁耐，終於狠狠地豪擲5260萬鎊收購里昂前鋒拿卡錫迪，是阿仙奴有史而來花最貴金額買一個球員！五千多萬鎊對於皇馬、巴塞、PSG而言，唔係咩錢，但對於雲加而言，係佢條命！你又點會估到今季雲加會突然攞條命出黎買人，可想而言，我地呢班槍迷鬧到佢幾咁唔開心。

山神話走又唔走

都話大家黑心腸，呢方面睇死阿仙奴唔會買人，準備取笑之際，同一時間又期待著山神心灰意冷，睇下佢會轉投邊個球會，然後再睇阿仙奴點死。哈，所以話轉會的事，又點會咁易估到，轉會窗開啟前，成日話山神輸到笑埋一份，對阿仙奴心灰意冷，以他的狀態與實力，阿仙奴只會浪費這個人材。轉會期間，多次傳出拜仁、曼城都有意收購，當中轉投曼城一事更講到似層層咁，總之大家都覺得山神走硬，只係等待是但一間球會公怖消息，而大家一直等、一直等，等到開學日，大家都等不了山神的消息，他亦沒有高調宣佈留隊，整件事就好像我們自己虛構出來一樣，白白期待與擔憂著。睇依家阿仙奴個勢，相信下年我們仍會等著山神離隊的消息。

盧卡古突然成「魔」

近年球員們興起一股「愛回家」熱潮，很多球員在外面撈起左或撈唔起，都會回歸母會，例如普巴、費托、大衛雷斯等，而在今季轉會市場開始前，人人都說在愛華頓踢得相當出色、打破愛華頓單季個人入球紀錄的盧卡古，來季必會回歸車路士，頂替干地不愛的迪亞高哥斯達。事實上，盧卡古也承認車仔的確找過他傾回巢的事，但偏偏殺出一個程咬金——曼聯，突然宣佈出7500萬鎊成功搶人，而盧卡古亦相當老實不客氣地說：「這是我夢寐以求的事，當曼聯打來時，我沒有思考過便轉會。」我們這班球迷亦沒有思考過，原來盧卡古夢寐以求的是曼聯，車仔？踏腳石啫。

莫拉達突然上「車」

曼聯在正式收購盧卡古前、宣佈收購馬體會基士文不果後，曾講到莫拉達是真命天子，這邊廂爆出曼聯會出價不低於8,500萬鎊收購，那邊廂說曼聯與皇馬已達共識，會於72小時內簽訂合約等，講到莫拉達一定是曼聯來季的主打前鋒。但最後曼聯的真命天子是盧卡古，咁之前吹到咁勁，莫拉達點落台？咪就係轉投想要盧卡古卻被曼聯搶走的車路士。其實係咪兩者夾定咁，邊有咁巧合，邊有咁峰迴路轉至得架？

AC米蘭的瘋狂收購

近年大家在轉會市場投放的焦點，不是英超便是西甲，意甲的發展愈來愈少人留意。不過這回轉會市場，AC竟然一口氣收購了十多位球員，但總花費也只是兩億歐元左右，成隊波都不及PSG「大哥」尼馬咁貴，幾乎球隊大換血咁滯。靜左一輪的AC米蘭，點估到一買就換晒成隊波咁樣，唔知佢地係咪真係有咩大計呢？