【鄒凱光專欄】作為Fans，你可以有幾盡力支持偶像？

我是利物浦fans，但我其實不只喜歡利物浦隊足球隊，我係喜歡整個利物浦市的文化、情懷、態度，球隊只是其中的一小部份，所以我支持但若球隊表現不濟，我依然會不留情的痛罵，所以我經常被真正的利記球迷指責，說我是典形的「勝利球迷」! 真正die hard fans係無論你支持的表現如何，你仍然會盲目支持到底！

其實我係認同做fans要盲目，但又真係有幾多個會做到呢？過去的十多日我一直思考著，如果我捧了多年的偶像，做出了不能接受的行為，我應該還是盲目繼續撐，還是沉默無言沒有踩多腳已經係支持呢？

當年有一位我很喜歡的人，佢逼我聽林夕填詞的歌，想洗我腦然後要我由撐黃偉文詞派，轉過來撐林夕，最終我同佢分手前，將佢ipod內的歌全換上黃偉文 填詞的歌，對我來講這已經係我對偶像付出最多的一次，但相比起die hard fans的付出，我絕對是微不足道

我認識一位電影監制，他是譚詠麟的die hard fans，是由校長第一日出道就開始支持，校長的唱片，CD當然全齊，演出過的電影當然全睇過超過百次，演唱一定場場支持，之後一定買兩隻碟，一隻睇一隻keep！

會覺得都係一般fans 行為？但佢當年還是當待應時，與譚詠麟只爭朝夕的張國榮來到他工作的餐廳，他選擇唔招呼佢，更不怕總經理責罵，憤然即時劈炮唔做，原因是我不會招呼譚詠麟以外的歌手！你覺得只是年少氣盛的衝動？但幾十年後，最近佢為拍攝譚校長的新專輯內全部MV，不惜轆爆所有人情咭，邀請各大演藝明星客串，我有幸被邀參與，現場全部是電影crew，根本就是電影製作，原來還求到錢嘉樂義助來拍攝一場飛車場面，人工唔收但器材錢都不菲，我好奇如何可以爭取到這樣budget：

「我攞多幾十萬出來拍，係呢個偶像至令我咁瘋癲！」

看見他嘴角含春，作為die hard fans可以滿足到偶像，嗑翻天是絕對可以理解的，我問他若你偶像犯了大錯，你還會支持嗎？

「偶像只是比我們叻的人!人就有優點缺點，人就是會犯錯，錯了除了要受罰，更需要支持去改過！」

當全城盡顯黑心口諸筆伐去聲討犯錯的藝人，我是多希望有一位他們的fans會撲出來大聲叫喊：

「你係做錯咗，仲好X錯！但我會依然支持你㗎!」