【幾鍾意揸車都會攰】請感激拜年期間為你走勻屯門觀塘的好「司機」

好多人覺得搭順風車唔好意思，好像佔了人家便宜，有些人更會客氣到payme返油錢和隧道錢給親戚朋友。但若然你問各位駕駛者，其實揸得車的話，隧道錢和油錢都在他們預期之內，大部份人都不會介意俾多少少錢送親戚朋友回家。再加上現在的電動車愈來愈普及，私家車技術愈出愈慳油，相比起泊車和其他養車開支，油錢真的不是什麼。所以大家遇上別人不太願意送你一程，不要一口咬定對方是為了慳錢，因為在金錢以外，還有其他因素影響駕駛者的意願。

如果你那位「司機」是好酒之人，你更加要感激他了！大時大節大家暴飲暴食的時候，駕駛者是沒有可能與你一起盡興！大家咪以為你朋友酒量好就唔緊要，其實酒後駕駛除了安全的問題外，亦是一個法律風險的問題。遇上吹波仔超標，少則停牌，一年半載無得揸車，嚴重更有可能要坐監。有些豬朋狗友一邊飲住啤酒一邊還會講風涼說話，「叫左你唔好揸車架啦！」

狂歡過後，你就在車內抱頭大睡，「司機」就在心驚膽顫下車你回家！無飲酒驚乜？咪就係驚大家嘔囉！相信不少駕駛者都試過望梅止渴的滋味，不過在這個情況下，作為乘客的你無論講一百次「辛苦晒」都無用，因為有酒不能飲的空虚寂寞感是無法彌補的。

前文提到大部份駕駛者都不太在意油錢，哈哈，但停車場錢就要小心！來回四十公里要四五十蚊，但在銅鑼灣泊車一個鐘都可能要四五十蚊。不少駕駛者都有種心態，就是一個鐘俾幾十蚊停車場好不值，而年初一唔抄牌的都市傳說近年可以說是完全破滅。嗱！俾人抄牌不是駕車嘅一部份咩？$320 話多唔多，話少唔少，但俾政府罰錢，都足夠條氣唔順一日！所以下次你見到你隔離個「司機」唔肯落車又或者唔肯車你去銅鑼灣尖沙咀，其實佢地係有苦衷的！

疫症期間應該較少出現這個情況，但我諗各位車主一定會遇過到商場食飯，食到一半先有車位嘅苦況。餓著肚子，上到酒樓通常都有好心人幫你留下餸菜，但吃著凍晒的炸蝦球和帶子，總覺得有點不是味兒。所以各位朋友，請記得提早少少出門，預早一起等車位，總好過上菜後仍然要「司機」餓著肚子。

無錯！駕車的人絕大部份都很享受駕車的樂趣，但幾鍾意揸車都會有攰的時候。在香港揸車絕對不是容易的事，要小心身邊的頭文字D，要小心身邊的假日司機，唔識路時又要一邊睇google map 一邊揸車，確實費神。所以大家下次坐順風車時，盡量不要一上車便抱頭大睡，不妨多和「司機」傾計，等佢唔使咁眼訓，落車時一句「謝謝你」和「辛苦晒」，對方已經很安慰了！