【葉浩文專欄】男人愛高達，女人唔明白

高達呢種只能夠出現係未來嘅設計，就更增添多一種幻想。我細個嘅時候鍾意瑪莎嘅自護號，佢冇腳，但係可以透過腦電波精神去控制，先突然諗起一兩年前Tesla嘅創辦人Elon Musk話要開發電腦同人腦技術，能夠心靈感應。其實係高達呢套作品入面早就有，每次瑪莎出擊，阿寶遠遠就能夠感應到，最後大戰三百回合。呢種科幻作品，每次都能夠對我地現實作出預言，我諗無數Fans都曾經幻想過，究竟一部高達真係建造出黎，會係點樣嘅呢？

高達係除左龍珠以外，日本最賺錢嘅動漫IP之一，原因好簡單，任何細路仔睇完都會忍唔住買盒模型返屋企，但即使長大亦都依然不減興趣，因為故事內容最核心其實係牽涉政治、戰爭嘅鬥爭，強調嘅反而係，即使高達係幾咁勁，能夠完全扭轉戰場局勢都好，都難以帶來和平。

理論上來說，呢一套描述戰爭的動畫，其實係一套反戰作品。呢套作品透過強大嘅機械人，吸引無數男仔，但又用另一個角度教導我地，呢種強大係有代價，會導致冇辦法承受嘅結果，反映戰爭嘅殘酷。

當然高達百樣好，都只有自己知，佢哋又會問，鍾意咪鍾意咯，點解要買隻模型番屋企呢？鍾意嘅嘢當然希望擁有，放係屋企見到賞心悅目，又能夠滿足到收藏嘅喜悅。

或者男人愛高達，女人唔明白，就好似我地呢一班男人，睇唔明每一隻唇膏嘅差別質感，等同於佢哋唔知渣古同高達嘅分別一樣，每個人對自己所愛嘅事情，都有唔同嘅執著，可以有好深層次嘅原因，亦都可以係因為好單純嘅喜愛。

各位女士若果你的另一半亦都熱愛高達，不妨嘗試去了解下呢一套作品，或者你都會愛上。不過就算唔喜歡亦都唔緊要，最緊要唔好干涉，有時只係喜歡高達，未必係一件壞事呢！