【葉浩文專欄】移動大數據與我們的未來

近年好多朋友都鍾意談論「競爭力」，有時同客人見面，有時係朋友之間傾計。呢個話題，在我眼中係非常貼身的話題，面對國內城市、東南亞等國急速發展，香港人、乃至整個香港的「優勢」與「競爭力」，仲可唔可以一馬當先？

每一個地方，如果擁有高效率的交通運輸系統，絕對係「競爭力」的重點，甚至係吸引全球人才和企業來香港的關鍵。而交通大數據，就成為改善系統必不可少的一大利器。你或者會問，交通大數據其實有乜嘢用，又可以點樣解決問題？我可以用幾個例子去解釋。

北京有一間處理移動大數據的智慧服務公司掌行通，長時間透過1,800個司機收集到的大數據，進行駕駛行為分析，發現平均每一個交通違規行為都會連帶7次超速、5次急刹車，4次急加速或急轉彎。

數據睇落平常，但如果仔細想，並且加以利用，可以解決好多問題。邊啲路段容易出意外、邊啲路段設計上存在缺陷，借助數據，就能輕易勾劃出評估報告，之後就可以優化路網，引導同教導司機點做。如此這般，整個城市的交通安全和效率，就可得到改善。

唔講你未必知，交通大數據早有人發展。2015年福特（Ford）從傳統車廠轉型為移動公司。在全球推出多項革新實驗，範圍涵括自動停車、汽車共享、遠端定位、自動車、無人車、大數據等。隨著全球市場汽車消費量飽和，其他傳統車廠好似BMW、Daimler、BYD都緊追其後，宣佈智慧移動藍圖，由傳統生產，變陣成移動方案解決的服務提供商。

我相信汽車業的未來，不再只是汽車，而是車、人同建築之間的溝通，其中需要大數據的幫助來實踐，只靠車廠數據遠遠唔夠，更加是要全人類通力合作才可達成。最近我與幾個拍擋成立了一個第三方交通數據收集平台，正是從一個想法開始。

比起其他大城市，倫敦、新加坡、東京，港府係開放交通數據方面十分緩慢。就算運輸署已開放部分資料，但得物亦無所用，因為很多是未經數據化，需要人手輸入電腦，資料更新亦唔夠，惟有寄望政府發揮帶頭作用，加強共享平台開放數據力度，鼓勵唔同界別參與，支持相關初創發展。

眼看一部部共享單車拋進城門河，到最後gobeebike敗走香港，不出兩年倒閉收場。香港交通的未來發展一直落後於鄰近國家，但唔需要灰心，依然有機會趕上，問題在於大家願唔願意正視缺點，向前行出第一步。

（以上評論為作者個人意見，並不代表本網站立場。投資者須注意投資涉及風險，價格可升可跌甚至變成毫無價值。投資者在作出任何投資決定前，應詳細閱讀有關之風險披露聲明及相關文件。）