回流不回流？移民英國生活、經濟以至情感都可能會遇上難題？

首先，最多人關注嘅，當然係財政上嘅問題。早前已經有個前香港資深教師出過PO，表示自己嚟咗英國之後得翻香港1/3人工，覺得前路茫茫，引起咗好大關注。的而且確，相對香港，英國搵工困難，人工偏低係一個事實。唔好話教師，相對於香港嘅絕大部份工種，包括種種專業如醫生、護士、律師、工程師，响英國嘅人工都低過香港一大截。

就算係响全世界都好吃香嘅金融業都唔例外，我哋有個响香港做投行嘅朋友，收到一個英國offer做返相同職位，但底薪都即時得返1/3。而唯一我哋聽過唔洗減人工，甚至有得加嘅工種，只有IT。

不過公道啲講，呢個現象都唔單只係出現响英國，香港人去到全世界都要面對相同嘅問題。如果你都有呢個疑問，會唔會諗吓其實自己响香港一直係overpaid呢？

第二，當然係生活上嘅適應問題。响移英港人群體裡面，好多人係從來冇去過外國生活，甚至未去過歐洲同英國旅行，要佢地霎時間响一個完全陌生嘅環境工作同生活，的確一啲都唔容易。當中，有人唔鐘意英國嘅天氣，有人唔鐘意英國嘅食物，有人唔鐘意呢度冇乜娛樂，冇乜夜生活，有人因為語言上嘅障礙，覺得好難同本地人溝通，亦都有人唔慣由白領轉為藍領，甚至覺得自己受本地人歧視。

事實上，以上都係一啲主觀嘅個人感受，唔可以代表大部份移英港人。如果當初係因為誤會而結合，之後冇辦法改變自己適應現狀，最後落得因了解而分開嘅地步，亦都係無可奈何。回流，當然係其中一個出口，但今日嘅香港又係唔係當初你所鐘意嘅香港呢？回流後又係咪肯定可以搵翻離開前嘅職位同人工呢？另外，身邊亦不乏二次移民嘅例子，加拿大、澳洲、泰國、新加坡、杜拜，天下之大，總有一個安身立命之處。

第三，响我哋認識同聽聞嘅回流例子當中，以單身或離異嘅個案居多，一來因為佢哋好多時欠缺親密嘅伴侶同家人嘅支持，面對逆境時難免變得脆弱和容易退縮，二來亦因為佢哋冇太大家庭上嘅包袱，比較容易另覓地方重新出發。相反地，有家庭甚至有子女嘅一群，一定好清晰知道自己所做嘅犠牲，都係為咗下一代將來可以响一個更加自由同開放嘅環境中發展同成長，所以就算面對再艱苦嘅困局，都只能咬緊牙關捱過去。九七前嘅上一代移英港人當年所吃嘅苦唔會比我哋呢一代少，既然佢哋當年都捱得住，點解我哋呢一代會捱唔住？

另外，有人留意到放負指數較高嘅多數係落腳响倫敦嘅香港人。呢一點其實都唔難理解，倫敦係最接近香港嘅一個英國城巿，亦都係最唔似英國嘅一個大城巿，香港有嘅缺點佢好多都有，英國有嘅優點佢好多都冇。所以好多响倫敦住嘅香港人仍然都要面對工資低、租金貴、通勤時間長、經常要塞車迫地鐵等老問題。

而且佢哋面對嘅經濟同生活壓力都普遍比其他城巿嘅人沉重，甚至患上情緒病嘅比率都會比其他人高。英國其實好大，我哋都有朋友响離開咗倫敦之後就好神奇咁發現好多問題都自然咁消失咗，唔到你唔信。

講到尾，每個人都應該有權利選擇自己想居住嘅地方，我哋都好慶幸自己除咗香港之外仲有英國呢一個選擇，至於回流與否實際上係好個人嘅問題。响我哋嘅移民經歷之中，都有講唔完嘅辛酸史，但最重要嘅一點，係要學識苦中作樂，境隨心轉！