【千頌C專欄】「加密救世主」奸有奸輸!SBF有幾怨恨趙長鵬?

千頌C
  • 16 Nov 2022

全球第二大加密貨幣交易所FTX創辦人Sam Bankman-Fried(SBF),短短一星期內,由「加密救世主」變成過街老鼠,160億元身家閃電式接近「清零」!

Sam Bankman-Fried(SBF)

FTX創辦人Sam Bankman-Fried(SBF)身家突然接近「清零」的過程,簡單去解說,有篇報道話FTX發行隻幣FTT係廢紙,於是世界第一加密貨幣交易所幣安、SBF死對頭趙長鵬(CZ),就引述一篇報道話:「驚驚,我好快會沽清自己手上嘅FTT」。

趙長鵬

之後FTT就暴跌,然後SBF就話:「我用22蚊接晒CZ批貨,然後FTX客戶就更驚,驚佢拎自己啲錢去接貨;FTX於是出現擠提。之後CZ話會出手相救又救,一石激起千重浪,SBF被爆佢偷FTX啲錢去幫姊妹公司Alameda填氹,資金缺口80億美金,於是破產收場。

趙長鵬

CZ係咪早有預謀,CZ「有橋自己知」,但SBF事後作出嘅反思,就令事情變得更有趣。要知道,SBF同美國監管機構關係非常好,更加係今次美國中期選舉民主黨最大捐助者之一,龐大嘅政治網絡成為佢攻擊對手嘅一大本錢。

Sam Bankman-Fried(SBF)

由於CZ同SBF近兩年開始互相唔妥對方,所以SBF不時對住監管機構唱衰CZ,而佢喺最新《紐約時報》訪問中,佢就咁回應:「我咁樣搞佢,對我來講唔係一個好嘅策略。」又話:「我自身有問題,就唔應該去搞人(shouldn't throw stones in a glass house)。」

FTX

講到CZ本來應承做白武士最後又縮沙,SBF就顯得更加晦氣:「可能CZ根本從來冇諗過真係會收購。」以上幾句講白啲,其實就係「自己條數又唔係乾淨,我就唔應該搞CZ啦。唔招惹佢嘅,我就唔會俾佢反咬。之後仲要俾佢玩多次,低聲下氣求佢救,開晒底牌俾佢睇晒成盤數,之後唔買之餘仲踩多腳。」

FTX

依家回想返,如果CZ真係唔想自己沽貨行動會令市場震盪,當日就會接受以22蚊美金沽俾FTX;而今日FTX正式滅亡,幣安亦旋即公佈,準備成立一個產業復甦基金,又計劃與同業參合作,制定全球數碼資產標準,霸主之位更牢不可破。幣安大戰FTX一役,FTX瞬間被擊倒,SBF衰在奸有奸輸,只怪佢嘅弱點一早俾人睇穿,以為冇人敢篤爆佢件國王的新衣。

Loading...
YOU MAY LIKE
訂閱Esquire接收最新男士資訊及禮遇
Sign up FOR ESQUIRE_PAPER NOW!!
下篇文章