睇波係男人的浪漫？足球，應該和誰看？

足球，應該和老友看？

這個答案應該大部份人都不會反對。有咩浪漫得過同三五知己到酒吧，食住花生喝著生啤欣賞足球。在花生和粗口橫飛的酒吧裏，你會感受到每一個人都把日常的工作壓力徹底釋放。可惜當一班麻甩佬成家立室後，這些日子就愈來愈少了。

可能你們會相約在其中一個人的家中相聚，但在土地問題嚴重的香港，你又怎會在朋友家中大聲喧嘩，又怕會嘈親聽日要返工返學的阿嫂和囝囝，而粗口更加是一句起兩句止。所以到最後，一樣好應該做的正經事，都會變得不可能。

足球，應該和老婆看？

由於三五知己的睇波團愈來愈少，你又避免要舟車勞頓同趕住返屋企，到最後都係會留在家中，和老婆一齊睇波。我經常都好懷疑，究竟這樣的格局，算唔算係一齊睇波？當你好興奮咁嗌時隔離嗰個無反應，當你爆粗鬧越位時隔離嗰個唔明發生咩事，又或者除了C朗、美斯外，其他球員佢全部都唔識的時候，你會覺得大家出現了嚴重的鴻溝，到最後還是一起看王浩信會開心一點！

足球，應該和球迷會看？

唔知大家有無參加球迷會的聚會呢？這類聚會的氣氛真係好特別，球迷會的會員話熟唔熟，可能在網上或whatsapp group都會經常傾波經，但除了足球外又好像沒有其他話題。

我個人就不太喜歡這些球迷會的睇波聚會，因為大家捧埋同一隊，始終都無咩牙胶戰，極其量都是爭論下邊個踢正選會好啲，而且好多時都會員都會帶埋老婆女友一起參加聚會，令到大家變得斯斯文文，完全無法展露麻甩一面。

足球，應該和囝囝看？

如果大家有囝囡，可能都試過同佢地一齊睇波。我自己雖然未有咁嘅機會，但小時候都會和爸爸一起坐在電視旁睇波。兩父子睇波的確是一件好温馨的事，什麼是角球，什麼是越位，什至是一些做人的道理，爸爸都會好細心咁一一講解俾你聽。
最重要係，你個囝鍾意邊隊，支持邊個球星，都會好受你影響，不過這個專利只限於十歲或以前！

足球，應該自己看？

在資訊發達的年代，就算是你一個人在家人睇波，都毫不孤單。你可以在whatsapp group 和朋友吹水，也可以到討論區表達意見。有時出去睇波，最怕後面個阿叔大大聲聲咁做球評家，在網絡世界你可以skip 晒所有唔啱聽的言論，而且在家中又可以減低開支，半場可以打場FIFA，又唔使俾老婆詐型。所以應該和誰睇波的問題，好多時都同想唔想係兩回事。