【鄒凱光專欄】每個飯聚搞手都應該拎晒諾貝爾所有獎

Esquire HK - 鄒凱光
  • 13 Sep 2017

我認為每一位負責搞「飯聚活動」的朋友,都應該無須提名直接得到諾貝爾所有獎。

「飯聚」並不是單細胞自動會繁衍出來,「飯聚」要搞至有,而要搞出一樣東西,首先要從目的中提取動力,「飯聚」的目的不外乎果幾個「生日喜慶」「工作需要」「朋友聚會」,但誰人負責把這個動力變成行動,去發起搞一個「飯聚」呢?即是開個Whatsapp Group的那一位,我一直無法理解為什麼世上有人可以如此偉大,肯犧牲自己去當一個吃力不討好的角色—飯聚搞手。

「生日喜慶」的飯聚,通常都是主角做搞手,所以九成以上的被邀賓客都因為俾面子而不設其他疑問下出席,和其他飯局目的比較,「生日喜慶」的搞手算是難度最低的一種!

「工作需要」的飯聚,如果老闆級,搞手通常都係佢個女秘書, 而要聯絡的,是其他老闆的女秘書,而女秘書大部份都叫「吳得」綽號「吳可以」,日文名「姥勢吾喜寬 」,由女秘書搞手提出飯聚的菜式開始,他們就輪班出場 「Boss吳得 果間餐廳」「老闆 吳可以 食生泠嘢 」 「佬勢吾喜寬 食辣嘢」,但搞手還是要見招拆招,不停推倒從來,找出一個各位老闆個「秘書」都滿意,令「姥勢雪可耳」能夠出場的方案,勞心勞力,搞一次食番半斤燕窩都未必補得番,所以秘書們通常黑面西樣是絕對可以諒解的,因為這些搞手還要處理其他員工級別的飯聚,例如公司周年飯聚,或者接待外國合作伙伴,搞手選擇了去鯉魚門食海鮮,但有員工不停踩鯉魚門海鮮唔抵食,提議轉去三聖村的美而廉海鮮酒家,搞手不能就此就範因為在順得哥情失嫂意理論下,若你妥協改動,其他人知道可以改,就會紛紛表達不同意見,冰雪聰明的女秘書不但沒有妥協,更發現原來提議食三聖材的同事家住屯門,女秘書搞手索性把食海鮮的地方改到老遠的南丫島,還完美地解釋「有風味,最重要係包唔會塞車」搞手就是要同事們知道,你一個人得罪她,但要全組人一起受罰,你還夠膽有下一次嗎?!

當一個稱職的「工作需要」飯聚搞手絕不易,但相比起當「朋友聚會」的搞手,難度上還是有所差距,「工作需要」你還可以用恨辣手法促成飯聚,但對著「朋友們」,齋惡絕不可能是專業搞手路唯一招數。

試想想你的whatsapp突然多了個Group叫「朋友很久沒有飯聚」,而你是被邀請的其中一位,你第一件留心的是「吃什麼」,然後就是還有誰會出席,這個亦都是重中之重,「飯腳唔夾,再好食都變垃圾」,所以如果搞手的水準不夠專業,完全沒有深究各人的性格、喜好,還有他們之間的瓜葛、恩怨,以漁翁撒網 把phonebook上有的都叫,作為被邀的,只可以沉默靜觀其變,「睇吓有邊個會去先啦!」。

你識咁諗,人家都諗,大家都睇定d先,於是就無人會回應,專業的搞手在這時侯要再問大家「係咪食嘢個地方唔啱食?我可以搵過㗎!」,如果再沒反應,就要拉一兩個朋友幫拖,指名道姓問「XXX 你係咪唔鍾意食xx菜呀?」,而專業搞手一定會放幾位幫手暖場的朋友進飯局邀請列上,當有第一個人答會去,其他朋友才會開始發表關於飯局的初步反應 :「 呢間好多人都話好食,有位咩?」、 「我有朋友上星期食過話麻麻」、「食呢間點解唔食xxx喎」、 「呢度泊車無優惠㗎」!

專業的搞手要逐一解答,安撫,務求可以力保飯局的地點,否則一旦推翻,就會再陷入「咁食乜好?」但又從沒有人再提議的膠著狀態,最緊要是保持進度,因為解答完以上問題,又有朋友開始會 宣佈「呢排公司多嘢做,要遲半個鐘到」 、「我後面仲有局,不能太遲開始食飯」「食飯果個地方喺室外,天文台話會有雨喎,同埋室外咪有人食煙囉,我真係好怕煙味」。

雖然專業搞手心裡面回應著:「你公司無嘢做,你都例遲至少半個鐘㗎啦!」、「你想話俾我知你後面有局好威咁啫,我知㗎喇!你真好威呀!」、「周街都有人食煙,妳唔好出街啦!笨!戴口罩吖!笨!」,但最終還是以真誠的去解決各位的每一個疑難「做嘢要緊!我哋食住小吃,飲住酒,總之食住等你啦!」「放心!果度起菜好快,保証你食飽飽咁去下一場」 「我訂咗果個位有簷蓬,問咗現場有大風扇,就算有人食煙,d煙味都應該吹走晒」。

當終於定下時間,地點,人物,為免到飯聚時有人甩底,專業搞手會搵一間要先付款的餐廳,但「等入錢」是搞手另一個考驗,作為一個專業搞手,心知這些「飯錢」同「帛金」是一樣,絕不可以「出住先」,搞手會給予餐廳的戶口,讓你直接過數,沒有入數就當不出席。

終於搞得成個飯聚,但專業搞手工作,還要確保飯聚過程不能沉悶,要因應出席朋友,想定配合的話題,有時絕望到會玩集體遊戲,例如電話apps上面的「有口難言」,是最容易製造氣氛的!然後就是搞手要確保食物及服務質素,否則以「識食專家」自居的朋友會大肆批評,又或者飲多了兩杯的朋友,實會借投訴醉洒鬧事!到飯聚大功告成的翌日,群組上有朋友以感謝搞手來表示對飯聚的滿意,一個專業飯聚搞手才算合格地完成己任,報酬就是保証以為後可以繼續做搞手!

你有遇過這樣能幹又不辭勞苦還充滿熱情的飯聚搞手嗎?若遇到請好好珍惜,不竟世上 好的飯聚搞手有限,衰的飯腳卻滿街都是,當中包括我在內!

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章