走到一間老牌西餐廳，赫然發現過來招呼我的，竟然是我一位多年不見的親戚，他是我長輩，但大我兩三年，是我成長的日子裡，有份帶著我四圍發掘新事物的重要前輩，我的無數第一次都是他帶給我，例如在青龍頭划艇出海垂鈎，翻艇游回岸行去荃灣；他當夜店警衛，從後門帶我入場但被發現，即當我是賊狂打我；馬場撞到叫我買紀仁安隻紅珊瑚，令我人生可以中過99倍獨贏的冷馬！
也曾幾何時令我以為他是真正對賽馬有深入研究的專家，但後來他一次又一次俾完貼士我，然後叫我順手幫佢入錢入電話投注，之後從沒有還錢給我，我知道他只是個自以為是專家，但其實到頭來都係輸多贏小的爛賭仔！我停止再幫他入錢，嘗試過追他還錢，但最終搞到親戚一場，見到面都要扮唔識，我其實一直想同佢講：「我深信世上是沒有借錢，只有攞去，沒有預過會還，你仲記得已經托賴」，不過這十多年來，我一直沒有機會跟你說，因為我們竟然從未相遇過，而想不到再遇又這麼荷里活電影的套路，莫非我也像電影中的主人翁一樣，在一年快要完結的落寞日子裡，竟然遇上奇蹟。
「老表！好耐無見……」
我們四目交投了一會，他似收到我心裡面無間大叫著的話：「你記得你爭我錢過呵？」
他伸手拍拍我的膊頭 ：「雖然咁耐無見，但我仲記得嘅！你等我一陣」
他沒有等我回應，講完就直走往廚房去繼續工作！那一刻我確實置身於荷里活電影的套路裡，一個奇蹟帶出親情可貴，從而發揚人與人間的信任，彰顯人性光輝一面！然後我又想起，佐治古尼幾年前找來十四個曾經在他潦倒時照顧過他的朋友，每人給予他們一百萬美金以報當年救命之恩！
說不定他現在已經幾個翻身，以貴為這店大老闆，咁大家當然舊數免提，你從此列我入「華人永遠鑽石會員」，毋須卜枱、堂食外賣、任食任拎……想到這裡的時侯，他回來及把一杯凍奶茶放到我面前。
「我仲記得嘅！ 邦仔你飲凍奶茶要落花奶㗎嘛！第二度要加錢，呢度我請你啦……」
我真係多x謝晒請我飲凍奶茶另加果細杯花奶，我估應該同松露、魚子醬一樣級數，難度你還會打算澄清嗎？還是趕快食完閃罷喇！最後仲發現他打了個九折俾我，有嘢學仲肯收平，仲唔係又食又拎！
我衷心多謝他教會我做老千要先呃到自己，要唔想還錢首先要當自己無爭人錢，原來並不是最高層次，真正高人會把債主變了另一人，阿光變了阿邦， 只愛飲咖啡變成花奶凍奶茶，世上並沒有一個債主叫阿光，只有一個他好關照的老表叫阿邦！
離開時他笑著送我走：「得閒再嚟，唔駛等位，花奶全免…… 拜拜喇！阿邦！」
那一刻我真係質疑，我其實係咪真係阿邦呢？
