【鄒凱光專欄】你有無儲分借里數升級身份的「毒」癮?

Esquire HK - 鄒凱光
  • 24 May 2018

有沒有數過自己有多少積分卡會員卡?儲積花儲印花儲飛行里數,付出大量金錢時間成本,最後可以升做金卡鑽石卡的感覺,就好似贏了比賽般有勝利感?或者,你跟灘叔一樣,都中晒「儲嘢」的「毒」癮。

「儲齊一套蓋掩, 可以換領名貴禮品乙份」


「儲齊一套蓋掩, 可以換領名貴禮品乙份」

如果你明我乜,往下的可以一字不看,但若你不是我們的年代,我告訴你「集齊蓋掩」是香港「蓋印仔」的始祖,我們曾經為了換到那份超無謂的禮品,天天像毒癮一樣,飲完一支又一支又甜又無益的汽水,直至到飲到所有蓋掩都儲齊,至感到功德圓滿,可以轉去儲蓋薯片內那張幸運小咭,然後食到成面爆瘡,但未儲齊都唔會收手!這就是「儲印花狂」的命運。

儲印花儲分儲里數


儲印花儲分儲里數去換以為的著數,其實絕對是等同吸毒的行為。

因為儲嘢確實會有癮,毒癮發作時確實會好失控,例如幫我清潔的阿姨,手腳淨乾,從不說話,做完就走,但有一 次佢見我抽住袋7仔回來,佢問我有沒有印花,我其實都唔知佢講乜,但佢見到我袋裡有印花,佢竟然直接地話「印花你應該冇用,俾咗我換嘢!」,全程以下犯上,奉旨要俾佢咁,黑人憎完全唔似平日的佢,阿姨就係因為毒癮發作而失控! 但請不要取笑她,難倒你人生中,沒有試過為了儲分儲印花儲里數而做出過如同吸毒後失常的行為嗎?

而世上有一 種最毒的毒癮叫 「身份象徵」,就像從前還流行到實體店買衫的年代,我們有幾多俾幾多再轆爆咭都係為咗得到那張九折會員咭可以永續下去,然後某天你發現某某原來已經擁有七折會員咭,某某的身份比你高了,你要加緊努力,為五折會員咭傾家蘯產,有時未夠彈藥upgrate,要力保不被downgrade,都並不是件簡單的事!

【鄒凱光專欄】你有無儲分借里數升級身份的「毒」癮?

我在馬會由於屬於資深用戶,幾年前他們給予了我成為某club的銀咭會員,我可以享受銀咭會員的優待,泊車位,出入的私人廂房,一切都係「身份象徵」,但我上季因事忙,參與賽馬活動小了,今季我被downgrade至紅咭會員身份,我個心唔舒服咗好耐,同老豆入場,佢問做乜泊到咁遠,我答佢「放心!下季一定泊番近!」,「之前果度好食啲,點解唔去番果度!」「放心〝 下季再食好d!」 將貪慕虛榮射佢父子情,我就可以激昂地宣稱「決定為咗我老豆,要今季之後ungrade番上去銀咭!」

【鄒凱光專欄】你有無儲分借里數升級身份的「毒」癮?

於是我今季,差不多每次賽馬日都入場儲出席率,然後擔心自己注碼太細,每次要集合其他朋友在我戶口投注,來加大投注額,還盡顯忠誠,參與club的所有活動,買齊club出產那些毫不實用的紀念品,出一份買一份,終於我在今季完結前,回升至銀咭會員,收到通知的那一刻,我鬆了一口氣及好想第一時間約老豆入馬場,話佢知我哋身份無變!

然後我再想,我往後就要向金咭、鑽石咭方向進發,而我肯定之後一定會再加宇宙級會員,神級會員……我真的這一生也在進取,然後一追再追,我感到好疲,但問題都來到銀咭,我要放棄應該在之前放棄吧,何不選擇進取向上,向老豆可以泊在近入口處的車位落車而努力!你睇我毒癮幾深!但距離神級儲分者,我都只是初級會員!

【鄒凱光專欄】你有無儲分借里數升級身份的「毒」癮?

我認識的神級儲分者的日常生活是這樣的,飛倫敦住一晚某酒店儲里數儲酒店會藉分數,然後往名店選購只為VIP特設的優先購買權,順便儲VIP會藉分數,然後以貴賓身份被邀到某某米記五星級餐廳,享用年度大廚聯手泡製的可一不可再餐單,咁當然好昂貴但又繼續儲到在此餐廳的高級客人身份地位 !然後選擇坐法航飛一程到德國某某名車廠,以VIP身份試揸最新的跑車,儲完VIP分數,然後飛回巴黎,入住半晚某某大酒店,儲酒店貴賓入住分及法航里數,力保金咭地位,翌日等巴黎名店一開門,完成最後VIP儲分購物後,專車往機場返倫敦再飛返香港!

愛儲分的你,是否覺得望塵莫及,不要氣餒,我這位神級儲分者,最初都是由儲7仔印花開始,只要閣下肯努力,絕對有天會變成佢咁神,唔信你咪試吓囉!

Loading...
YOU MAY LIKE
訂閱Esquire接收最新男士生活資訊
Sign up FOR ESQUIRE_PAPER NOW!!
下篇文章