投資英國物業有甚麼房屋種類選擇？獨立屋、公寓、學生宿舍哪種更適合投資

香港地住得獨立屋嘅畢竟係小數中嘅小數，但英國人住响獨立屋或者半獨立屋嘅比例一啲都唔少，所以佔據咗一個頗大嘅巿場。當然，獨立屋或半獨立屋嘅樓價比其他類型高一截，通常包括前園、後園、車位同車房。呢類屋嘅入場費高，成交唔多，轉手亦都唔易。

而且獨立屋或半獨立屋亦都因為樓價貴，維修保養成本較高，所以回報率亦偏低，自住當然冇問題，但用嚟投資就冇乜著數。除非，你打算買一間低水嘅爛屋返嚟重新裝修、加建，繼而轉售(當地人叫Flipping)，咁就唔同，但係條件係你要對入紙改建程序有一定認識，同埋與當地嘅測量師、承建商已經有唔錯關係，否則最終只係浪費時間、勞民傷財。

與獨立屋同半獨立屋相比，排屋嘅室內面積同花園比較細，好多時甚至冇前園同車位。但排屋可以話係大部份英國人居住嘅樓宇類別，選擇眾多，轉手容易，入場費亦都相對便宜(當然視乎地段，倫敦同蘇格蘭嘅樓價係差天共地)，所以好多英國物業投資者都會從排屋入手，貪其需求量大，回報穩定，亦都有一定升值潛力。

雖然排屋嘅空間比較細，通常得兩房或者三房，但一樣可以玩Flipping，只要花少少錢做加建，幾乎可以肯定令樓宇即時增值。不過佢嘅缺點一樣係維修保養成本高，特別係一啲幾十年甚至過百年歷史嘅排屋，如果屋頂或者煙囪需要維修，就會產生一大筆洗費。

公寓當然係一般香港人最熟識嘅樓宇種類。不過英國嘅公寓同香港嘅玩法有啲唔同。首先公寓响英國所佔嘅比例唔算高，多數興建响大城巿，或者人口密集嘅小鎮，特別係靠近鐵路站嘅地方。香港人最常接觸嘅英國公寓應該係成日响酒店展銷會上推銷嗰種新樓，但其實呢種新樓嘅樓價都Mark up咗唔少，成交之後樓價只會不升反跌，加上呢類新式公寓有太多設施同公共空間，管理費貴得相當驚人，如果出租嘅話會令你嘅收入即時少咗一大截。

另外需要留意英格蘭嘅公寓絕大部份都唔係Freehold，而係Leasehold，即係話業主唔具有土地擁有權，要每年向政府交地租，當業權到期後（通常幾十年到幾百年），就要將業權歸還俾地主或者花一大筆錢續期。

對於純粹物業投資者嚟講，學生宿舍係幾好嘅一個選擇，因為入場費可以好低(幾十萬港紙起步)，管理相對簡單，回報率唔錯，而且只要集中搵大學城巿，例如曼徹斯特、利物浦、列斯、布里斯托、巴斯，都幾乎肯定租得出。

好多上一代嘅香港人對於投資學生宿舍都有一啲經驗，因為佢哋過去已經好有遠見咁响心儀大學附近買定一間宿舍等仔女將來去英國升學時居住，到仔女畢業後又可以繼續收租攞回報。如果你咁啱都有咁嘅需要，投資學生宿舍的確十分啱你。

相信好少香港人會留意英國嘅渡假屋，不過英國本地人就幾鍾意呢種投資產品。一來，佢哋鍾意每逢暑假都去海邊渡假，但到時租屋唔單止唔容易，租金亦都會大幅飆升，咁不如自己買返間渡假屋，唔使同人爭。部份渡假屋係用磚為建材嘅永久房屋，但其他大多數都只係用鐵皮或者木材搭建，可以用拖車移動，屬於臨時房屋，所以入場費非常低，最平十幾萬港紙有交易！

但每逢旺季就好搶手，一個月已經可以幫你賺返萬幾蚊租金。當然，渡假屋嘅壞處係需要向所屬渡假村交管理費，如果你自己Manage嘅話亦可能要同Airbnb拆賬，同埋到咗旅遊淡季都幾乎一定係冇收入。

如果你屬於進取型嘅投資者，HMO呢類物業應該會適合你，因為佢其實等如香港嘅「劏房」，玩法就係將一間面積較大嘅物業拆細，分租俾多個單身嘅租戶，從而創造出最大嘅回報。隨住呢個世代離婚率高企，城巿人口流動性高，英國住戶對於HMO嘅需求越嚟越巨大，由此亦到吸引咗唔少投資者加入呢個巿場。

一間「劏房」閒閒地都要7,000至10,000港紙租金，一間四房半獨立屋本來只可以租到25,000蚊，業主只要將間屋一拆四變成HMO，租金收入就可以即時翻一翻。

除咗以上幾個比較常見嘅投資種類，英國房地產巿場仲有好多其他嘅玩法，都仲未講農莊、酒店、城堡呢啲類別，唔係講笑，呢啲產品並唔係你想像中咁遙不可及，對於唔少香港人而言其實都可以負擔，有機會可以再分享吓。