【葉浩文專欄】新入金融業有些規矩你要知

Esquire HK - Kirk Yip
  • 29 May 2017

返工,被人覺得你不懂大體當然大件事,但是原來有些好簡單的細節位,未必人人留意得到。Kirk以行內人的角度,分享這些簡單但輕易被忽略的規矩,如果你係新入金融業,不妨睇睇,你的工作可能會大有幫助,做了好幾年無咩起色的人也值得睇,可能發現自己就是差了這一點點!


“Dear Kirk....Thank you for sharing your professional knowledge with me....please do keep in touch.” 

上星前五是同事B的lastday,臨走前留給我一盒散水餅貼著一張memo,寫著以上這幾行字。

同事B入行兩年,做事不算標青, 卻十分幫得手,回想佢返工頭幾個月, 頭頂仍掛著舊雲,同事不時微言,「佢識唔識規矩架?」有日放工我忍唔住捉咗佢去飲嘢,同佢講「新入金融業有些規矩你要知……”」。

規矩一: 唔使急,最緊要快

上個月去台灣出Trip, 食完晚飯同個客散步咗一陣,佢話“ 我知道你喜歡跑步,但也不是吃完晚飯還要跑嗎?” 我說 “Sorry, 也許是職業病吧。”

金融行業分秒必爭,好多老細心態大多都係“唔使急,最緊要快” ,所以做金融身體差少少都幾難應付這種工作節奏 。新人入行,夜晚蒲少啲同多做運動一定冇錯。 加上近年唔少管理層都好重視健康生活,對員工已不單止睇工作表現,生活習惯都好重視。 兩個新人如果工作能力差不多, 一個健康sharp醒,一個冇朝冇氣, 你係老細,你會點揀。

規矩二:要「知定」

除了節奏快,金融行業非常講求效率。跑deal做融資, 會駁會, 一日跑 6、7場Roadshow是等閒, 務求可以在有限時間內pitch到最多客,見到最多公司。避免浪費時間在交通上 (不能花多個15分鐘喺會與會之間),係我對負責安排Roadshow同事的最低要求。

中環、上環經常塞車,上落車麻煩,泊車搵位難,行路搭地鐵分分鐘快過坐揸車或坐的士。 所謂「知定」, 係指要識路,新入行的, 有時間可以開住個google map 行熟呢幾地區,做定功課, 睇下老細最熟幾個客的office位置,plan定路線,若然plan到條路線老細唔駛日曬雨淋,行得舒舒服服, 自然有分加!

規矩三: 西裝要啱身, 頭髮要醒神

金融係一個建於人與人相處溝通行業,給客戶/合作夥伴良好觀感非常重要,而正確打扮更係重中之重。 好的形像在於「品味、細節、有要求」, 所謂devil in the details,初入行的最好養成呢兩個習慣:定期剪頭髮、西裝恤衫要訂造。 

頭髮唔好等又長又亂先去剪,乾淨整潔的髮型,較易給人爽朗直接感覺,男人三個星期就好剪一次髮,若然天生一副baby face,不妨gel番個all back頭,令你睇落穩重專業。

訂造西裝恤衫,布料選擇好重要,但唔係貴就好,揀料做衫最緊要啱場合,啱用途。 純棉布恤衫係舒服,但容易皺, 返半日工就好易變成梅菜咁,非常唔好睇。 恤衫料方面,我建議揀poly cotton料,大約65%棉,容易打理唔會皺。 西裝方面,wool/cashmere 混合布做出來不單止耐用, 而且較為輕,著出來感覺輕鬆瀟灑好多。其實只要西裝夠啱身, 恤衫夠新淨,已經好得體。

老細都唔會期望新人會幫佢氹掂個客或者 close到單deal ,因為佢亦唔想你做埋佢嗰份。 總之大家分工合作, 可以幫老細做到以上安排,已經係非常稱職的幫手。

Loading...
YOU MAY LIKE
訂閱Esquire接收最新男士資訊及禮遇
Sign up FOR ESQUIRE_PAPER NOW!!
下篇文章