【葉浩文專欄】夏天著西裝想死？教你如何保持形象

不時聽到身邊女性朋友或同事有這類投訴，「夏天返工迫地鐵，最怕前面企著個濕到透點的男士」，或是「阿A成日一件白恤衫返工，裡面唔著底衫，每次响我面傾嘢，我都見到佢透視咁，其實好唔自在。」由此可見，男人返工著唔著底衫，已經唔係一件個人的事。

講到男仕返工衣著，每逢6、7、8月，對那些沒有選擇地需要著恤衫西裝返工的男士，算是最痛苦的季節。如何在炎炎夏日的上班日裡過得舒適，得體又專業，以下幾點要留意。

恤衫打底好緊要

好多男性朋友/同事對著底衫好抗拒，據非官方及以我在中環區内目測，七成以上「中環西裝友」都唔著底衫。

問過身邊朋友，怕熱的話：「天時暑熱仲要兩件衫很難頂。」

貪靚的會話：「恤衫裡面有底衫印唔好睇。」，理由多多。

夏天要保持形象，建議找一件舒適啱身的底衫打底。既可以令恤衫更耐穿， 重要係唔會令身邊女仕難為情。個人推介「雞仔嘜」或Calvin Klein全綿兼背心，適合修身恤衫打底之用。

黑色唔係唯一嘅選擇

經常有fashion界朋友講「又話中環人有品味，點解每次喺Armani Aqua Happy Hour 望落畢打街，不論四季至少七成男人返工都係著黑色西裝白恤衫，真係好悶！」記得剛畢業入投行，老板同我講「做事求穩陣，唔好標奇立異」；返工著衫沉色睇落會較專業。” 一直以來，華人社會及金融企業在上班衣著顏色佩搭的接受程度，與外國及其他行業相比是較保守，那位老板有這種想法我是明白的。

但今時今曰，黑色已經唔係營造專業外觀的唯一選擇。尤其在夏天，男仕可以選擇淺色系西裝，例如淺藍、淺灰、米色、淺卡等安全色。除了較不易吸熱，視覺上也較為清涼無負擔。另外，褲的長短亦要注意，九分褲款能讓整體更為俐落清爽。

啱夏天用既Hair Product

我梳All Back髮型 ，因為同西裝是永遠不會錯的組合，但在大汗揼細汗濕的夏天，加上返工早出晚歸，又點去保持造型持久？

要令All Back髮型夠持久力，可以先用打底產品，情況就好似化妝要打好個底先可以上粉一樣。夏天我用Original By BluMaan| Styling Meraki，呢隻產品可以同時做到打底加造型，如果你怕麻煩，可以試下呢種髮蠟，濕髮時搽一次，之後吹頭向上吹，最後頭髮乾後再用一次，可以做到蓬鬆造型而且乾爽、光澤不會太亮太啞，感覺自然不造作，適合著西裝形象。

非常時期用非常手法

早排紅雨返工，Office見到超過一半男同事四圍嗌住「有冇人有風筒呀？」「暖風機放咗喺邊？」「我對皮鞋玩完了。」

夏天好多時風大雨大，正所謂特事特辦，下次要在紅雨的一天出發嘅時候 ，大家不妨考慮下我呢身造型。

P.S 其實我有西褲皮鞋在公司可以更換，非常時期用非常手法，我呢身造型客户見到後都話要學下。