【移民英國】倫敦10大香港人熱門落腳地｜環境、樓價、生活配套比較！哪城市更宜居？
- 08 May 2025
近年唔少香港人選擇移民英國，倫敦自然成為熱門落腳點。倫敦咁大，究竟邊啲地方最多香港人住？環境靚唔靚？治安又好唔好？今次我哋就同大家數一數最受香港人歡迎嘅倫敦十大居住地區，等你搵樓前有個清晰概念！
1倫敦10大香港人熱門落腳地－Sutton（薩頓）
Sutton近年被譽為「Little Hong Kong」，因為好多港人家庭都搬咗嚟。呢區最大賣點係校網勁，Grammar School同Outstanding公校多，適合重視子女教育嘅家庭。環境清幽，綠化多，生活節奏慢，治安亦屬倫敦前列。
Sutton－新晉「小香港」家庭首選
Sutton生活配套齊全，超市、亞洲雜貨舖、港式餐廳愈開愈多，港人社區活動亦好活躍，响High Street一定會撞到同鄉，無論新移民定老街坊都容易融入。呢區平均樓價約£452,544，性價比高。
2倫敦10大香港人熱門落腳地－Kingston upon Thames（京士頓）
Kingston係傳統中產家庭區，治安極佳，每千人只有57宗罪案，屬全倫敦最低之一。區內有多間Grammar School同Outstanding學校，包括有名嘅Tiffin School(男校)同Tiffin Girls' School(女校)，深受港人家庭歡迎。
Kingston－安全優質校網之選
生活配套一流，有大型購物中心(有Apple Store)、河畔餐廳、戲院、運動設施，交通方便，火車30分鐘直達Waterloo。呢區環境乾淨，河畔景色靚，平均樓價約£986,438，中產人士首選。
3倫敦10大香港人熱門落腳地－Richmond upon Thames（列治文）
Richmond係倫敦最安全地區之一，每千人只有54宗罪案。區內有面積極大嘅列治文公園、比鄰泰晤士河畔，生活悠閒寫意。校網唔錯，有多間優質學校。
Richmond－英倫田園詩意生活
生活配套完善，餐廳、超市、精品店林立，適合追求高質素生活、重視環境同安全嘅家庭。不過，咁理想嘅地區樓價當然一啲都唔平，呢度平均樓價約£952,814，同Kingston upon Thames叮噹馬頭。
4倫敦10大香港人熱門落腳地－Wimbledon (溫布頓)
好多香港人認識呢個區，因為响呢度舉行嘅網球賽事。其實，Wimbledon同Kingston、Richmond可以話係倫敦西南部三個最理想嘅住宅區，平均樓價約£800,000–£1,000,000，同樣深受香港中產人士歡迎。
Wimbledon－生活節奏舒適
呢度生活節奏舒適，有靚公園、大型超市、特色小店，High Street應有盡有。學校方面有King's College School呢啲頂尖私立名校，啱晒有讀書計劃嘅家庭。治安亦係倫敦數一數二好嘅地區。
5倫敦10大香港人熱門落腳地－Colindale（科林達）
Colindale同Sutton一樣都係「小香港」，Bang Bang東方城同兩間大型中超成為當地港人嘅生活重心。呢區新樓多，樓價相對親民，平均樓價約£454,000，相對倫敦其他區域都算容易負擔。
Colindale－入市中心夠快
Colindale交通方便，搭地鐵半小時入市中心。生活配套齊全，亞洲餐廳、雜貨舖、港式茶餐廳應有盡有，適合想搵返香港味道嘅朋友。
6倫敦10大香港人熱門落腳地－Ealing（伊靈）
响香港人進駐之前，Ealing本身已經有好多日本人居住，所以呢區本身已經有好多日本餐廳、甜品店、超巿同小店。可能因為呢個原因，令到一向崇日嘅香港人特別鍾情於呢一區。
Ealing－港人最愛日本小社區
Ealing屬於Zone 3，離巿中心唔太遠，Elizabeth Line開通後，坐Tube出巿中心只需要22分鐘。呢區治安整體良好，平均樓價£580,000，算係相當合理，因此成為咗香港人嘅熱門聚居地。
7倫敦10大香港人熱門落腳地－Harrow（哈羅）
Harrow以校網優秀見稱，區內有多間出名學校，雖然冇Grammar School，但Good同Outstanding學校選擇多。治安良好，環境寧靜，適合重視教育同住得舒服嘅家庭。
Harrow－名校林立，家庭至愛
Harrow呢區平均樓價大約£578,125，性價比都算唔錯。亦都因為以上種種優點，呢度亦都吸引咗頗高比例嘅亞裔人口聚居，可能同你想像中嘅英國環境有少少出入。
8倫敦10大香港人熱門落腳地－Barking and Dagenham（巴金及達根咸）
因為好多人對於倫敦東區聞之色變，呢區本來唔係一個熱門嘅港人聚居地。不過後來愈來愈多人發現，原來Barking and Dagenham嘅樓價比倫敦低35%，平均樓價只係£351,439！
Barking and Dagenham－ 高性價比新興港人區
而且Barking and Dagenham呢度環境並冇一般人想像咁差，區內有25個公園同綠地，生活環境唔錯，新樓盤多，社區多元化，亞洲人比例高，生活配套逐步完善，所以好適合預算有限、或者想投資搏升值嘅朋友。
9倫敦10大香港人熱門落腳地－Tower Hamlets（金絲雀碼頭）
講開Tower Hamlets未必個個都知，如果叫金絲雀碼頭（Canary Wharf）呢？你就一定聽過，因為呢區係出咗名嘅金融業重鎮，吸引咗好多做開金融行業嘅香港人聚居。
Tower Hamlets－金融新貴集中地
Tower Hamlets呢區新樓多，生活配套現代化，交通極之方便，地鐵直達市中心。區內有Greenwich Millennium Village等大型發展項目，平均樓價大約£514,458，特別適合年輕專業人士、追求都市生活嘅朋友。
10倫敦10大香港人熱門落腳地－Greenwich（格林威治）
事實上，我哋認識唔少响金絲雀碼頭返工嘅金融才俊，都唔會住返金絲雀碼頭，一來因為樓價貴，二來生活配套又比較沉悶，佢哋反而會鍾意住响對面河嘅Greenwich。
Greenwich－歷史與現代交融
Greenwich呢區以世界知名嘅天文台同大學聞名，區內有大型新樓盤同購物中心、特色小店，生活配套齊全，環境優美，公園多，河畔景色一流。返工返學都好方便，適合家庭同學生居住。呢區平均樓價大約£470,000–£500,000，算係物超所值。
資料來源：London Property Guide, Housemetric, 2025年最新成交紀錄及地產網站綜合整理
