英國偷車罪案爆升！高科技偷車方法令人防不勝防！唔使車匙偷走你部車

唔使講都知，Range Rover、BMW、Mercedes-Benz呢類名車一向係賊人嘅頭號目標。呢類車多數都配備keyless entry系統，令到賊人好易得手。Channel 4嘅調查報導就搵到兩個願意蒙面接受訪問嘅偷車賊，佢哋好大膽咁對住鏡頭示範點樣用由Dark Web買到嘅無線signal放大器攞車匙訊號，只須企响受害人屋企窗口外面幾秒鐘，就可以偵測到車匙發出嘅訊號，然後就可以直接打開車門，撻著引擎，開車走人，整個過程唔使20 秒。反而對於Tesla，賊人表示因為架車太高科技，佢哋暫時束手無策，所以連記者都忍唔住口要讚Elon Musk勁。

據報導，英格蘭同威爾斯每日平均有355架失車，相當於每四分鐘就有一架車俾人偷走，數字高到嚇親人。最近數據顯示，2023–24年全年偷車案多達129,159宗，較前一年微跌但仍然高企，似乎本地警察根本就冇佢哋符。問到會唔會覺得受害人第二朝起身唔見咗部車會好慘，受訪賊人就好冷酷咁話：「呢啲車全部有買保險，俾人偷咗咪買過第二部囉！」

點解偷車賊可以咁猖狂？因為呢類偷車案件並唔係零散嘅個體犯案，而係由有組織嘅犯罪集團主導。偷車只係連串犯罪行為嘅其中一環，集團更會跨境運作：先喺英國偷車，响chop shop拆散成零件，然後响本地貨倉裝箱，再經碼頭運出口到東歐國家例如立陶宛，犯案者甚至可以偽造出口文件避過海關檢查，真係「過咗海就係神仙！」

偷車案唔單止令車主損失慘重，仲引發連鎖問題，影响埋我哋呢一類本地升斗巿民。首先，引發保險公司近年瘋狂咁加保費，尤其係針對Land Rover車主，部分車主每年保費飆升到5,000英鎊，唔單止貴過供車，其至貴過好多舊款Land Rover嘅車價。

另外，唔好以為只係價值幾萬鎊嘅名車會成為賊人目標，就算係只值幾千鎊嘅電單車，賊人都唔會放過。最近曾經有人目擊响倫敦宜家家俬停車場，偷車賊竟然响光天化日用電鋸鋸開鐵鏈鎖，然後在眾目睽睽之下將成架電單車騎走，而在場目擊嘅保安人員只係企埋一邊食花生！

面對咁離譜嘅偷車案，普通車主可以點做？綜合咗多位專家嘅意見，大家可以試吓以下幾招：
- Faraday盒阻截信號：將車匙放喺可以阻隔信號嘅鐵盒入面，等賊人冇辦法用放大器偷信號；
- 加裝軚盤鎖 / 波箱鎖：就算賊人解到鎖開到車門，都要再花時間爆多一個鎖先開到車；
- 盡量泊入車房 / 有CCTV的地方：泊街風險高，同時都會增加保險費，所以最理想係泊喺有監控嘅位置；
- 安裝GPS追蹤器：萬一被偷，短時間內仲有機會追得返，直至架車俾人拆咗件；
- 買車前查吓失車率：某啲熱門款車例如Range Rover嘅失竊率特別高，保險費都特別貴，真係要諗清楚先好買。

最後，仲有一個冇得輸嘅方法，就係唔好開靚車，換返架唔使一千鎊嘅「腳車」，例如無敵嘅豐田Yaris或者日產Note，咁就一定晚晚都可以一覺返到天光！