【移民英國生活分享】點解英國人咁鍾意吹水？如何應付英式吹水文化的生活

對於呢點，當初我哋都幾唔慣，因為香港人一般都好少會無端端同陌生人吹水，就算响條街到見到唔識嘅香港人，最多都係互相點頭微笑。但係如果對方係本地人，無論係响職場、餐廳、超巿，以至做Gym、放狗嗰時遇到，都無可避免要同對方最少吹兩句先可以離開。但當然，住耐咗之後就會發現佢哋其實吹嚟吹去都係差唔多嘅內容，離不開天氣同啲我哋認為係雞毛蒜皮嘅小事。

後嚟，當我識得愈來愈多本地人，就慢慢發現原來背後係有好多種因素構成嘅佢哋本土嘅吹水文化，所以新移民過嚟嘅香港人未必能夠好快咁適應同融入。

首先，英國嘅教育制度一向都好鼓勵學生發表個人意見同互相討論。相對於香港老師响堂上一個問題，就見到個個學生DUP低晒頭，英國課室嘅氣氛就完全係另一回事。我哋試過報讀一個英國本地嘅短期課程，課堂上每當導師發起公開討論，成個課室就變咗做一個街巿咁樣，最後更只得學生講，導師完全唔使講，但係到落堂之後，每個學生都覺得好滿意咁離開。

第二點，就係英國人有一種幾特別嘅民族性，就係佢地好唔習慣沉默，只要係有兩個或以上嘅人聚埋一齊，一遇到Dead air嘅時候，所有人都會覺得好尷尬，所以佢哋每一個人一早就訓練咗自己要擁有打破沉默嘅能力，甚至乎一早已經袋定幾句冇乜內容嘅說話响袋，一遇到沉默就會拋出嚟用。

事實上，吹水對於英國人而言的確係社交禮儀嘅一種，無論你鍾唔鍾意都好，願意主動同人吹水，通常都係一種對其他人嘅善意表現。我有個前上司每次向我介紹佢嘅新客戶，都會用「佢好nice」，或者「佢唔係好nice」去形容。其實，佢多數只係同個客傾咗幾句偈，就會得出呢個Judgement。所以，你响英國人心目中嘅印象係好係壞，好多時就係建基於一開始你有冇善意咁同對方吹水。

對於新移民英國嘅香港人嚟講，要同本地人打開話閘子，其實都唔係咁難，因為有條好實用嘅Formula：就係一開始嘅時候，你只要完整咁覆述自己今日發生過咩事，表達吓而家嘅心情，跟住再形容或者埋怨吓今日嘅天氣，最後再讚吓對方嘅衣著同打扮，咁就Okie dokie喇。當然，如果有人失驚無神咁問你"How are you?"，你都可以背熟以下幾句常用嘅簡短答案以備不時之需：

"Not too bad, thanks."
"Yeah, all right, cheers."
"Could be worse!"
"Getting by, you know."
"Oh, you know, same old, same old."
"Not bad at all, thanks for asking!"
"Surviving, just about!"
"Can’t complain… but I probably will!"

而最重要嘅一點，係當你嗰日狀態唔係咁好，或者唔想講咁多嘢嘅時候，只要簡單回覆之後再加多句："And you?"，咁就可以順利咁交返個波俾佢嫁喇！
 

不過，都有朋友同我哋講過，覺得英國嘅吹水文化講到尾都只係一種社交禮儀，就好似日本人習慣成日同人點頭，或者講：「唔好意思」一樣。因為當識佢哋耐咗，就會發現同佢哋除咗吹天氣，同埋啲雞毛蒜皮嘅日常生活鎖事，就唔會再傾啲深入或者高層次嘅嘢，原因係本地人一般都比較重視私隱，亦都唔鐘意同唔熟嘅朋友傾私人或者敏感嘅話題，所以對於收入、政治、宗教呢類話題最好就要盡量避開喇。

其實，英國嘅天氣咁多變，一年四季，甚至一個上下晝嘅變化都已經可以產生出咁多唔同嘅話題，如果再傾深入啲，我估真係出門口倒一倒垃圾，恐怕半夜都返唔到屋企呀！