【移民英國生活分享】五成移英港人失業？事實上有冇咁恐佈先？

首先就係呢兩、三年憑住BNO VISA移英嘅香港人之中，有好多人响心態上都係待業，而唔係真正失業。例如有唔少人响香港原本係公司老闆或者專業人士，拎住少則一千幾百萬港紙移英，過到嚟頭半年時間主要用嚟搵樓同適應本地生活，買樓用咗半年之後又用半年搞裝修同家居佈置。由於呢度好興DIY，好多香港人移民後時間多咗，變咗鍾意事事親力親為。

除咗屋企裝修，成個花園每幅草皮每塊階磚都自己設計自己搞，又有啲人鍾意玩車/整車，換呔換鈴換風隔換偈油，以前冇車房冇地方唯有俾錢車房賺，而家有地方有時間冇收入，整車唔單止成為樂趣，慳到嘅錢就當幫自己打工做Part time。呢類香港人我都識唔少，佢哋可能都有打算或者已經投身於求職巿場，冇工返但家庭生活忙過返工，咁又算唔算真正嘅失業呢？

第二個情況係，响香港大部份家庭都係雙職夫婦，照顧子女嘅責任可以外判俾工人姐姐或者四大長老。但係响英國冇得請工人，頓時又冇咗長老嘅支援，要照顧一家幾口，兩公婆之中點都有一個要留返响屋企照顧小朋友，接送返學放學。其實呢類家庭主夫/主婦好多都渴望投身返職場，賺多份糧幫補家計，但因為其家庭崗位角色令佢哋搵全職多咗一道好大嘅障礙，於是只能搵兼職、散工或者臨時工。如果一個家庭有一個人係呢個「失業」狀態，咁50%失業/待業率係完全合理。

至於我哋認識嘅第三類人，如果唔係身懷絕技嘅專業人士，就係熱門行業嘅專才。例如我哋認識嘅其中一個朋友，口口聲聲話會搵工，但嚟咗英國超過一年都未返工，其實佢心態一來係想休息一下，二來係想吊高嚟賣，因為佢本身係做IT，而IT人喺英國係非常吃香，後來佢只係認真咁開始搵咗工一個月，就已經馬上有工返，人工仲，哈哈哈哈！

但當然，移居英國嘅一百個香港人，會有一百個截然不同嘅搵工故事，真係比較少好似IT人咁，搵工過程可以咁順利，人工亦都接近甚至超過香港水平。

真正失業嘅例子好少聽到，反而我哋接觸得最多嘅案例係，初到埗嘅求職者係比較難搵到第一份工，因為未能適應呢度嘅求職文化，未執好CV，同埋冇上個僱主做reference check，但係當佢哋三幾個月後成功搵到第一份工，就識得騎牛搵馬，幾個月內就可以轉去另一份更好嘅工，甚至响半年內由最低級升做assistant manager。我哋認識嘅其中一個朋友，甚至响一年內做過九份完全唔同嘅工作（當然計埋臨時工），如果英國搵工真係咁難，又點可能做到呢？

其實只要睇返英國歡迎香港人委員會(Welcoming Committee for Hong Konger)上年11月發表嗰份調查報告，就知道其實「五成移英港人失業」論點係偏頗，因為份報告係話有52%持BNO Visa嘅65歲以下移英港人「Employed」，而已經開始搵工但「Unemployed」嘅就只有12%，而有媒體就直接將非就業嘅港人定義為「失業」，穿鑿附會之下先至出到份譁眾取寵嘅講法。

最近英國政府已宣布收緊移民政策，特別針對持畢業生簽證以及中低收入嘅外來人，例如以後年收入少於£38,700鎊嘅非英國居民，基本上今年起唔會被續簽工作簽證(除咗醫護同教育等獲豁免行業)。我哋認識嘅一啲持畢業生簽證嘅年輕人，或者持歐盟護照人士，已經疊埋心水知道冇得留低，因此正在計劃離開英國。

而好幸運地，呢項政策暫時係唔會影響到BNO簽證人士。即係話，當呢批中低收入人士離開英國之後，本地就業巿場好大機會出現更多空缺。對於肯做肯捱又擅於靈活走位嘅香港人而言，又點會愁冇工作機會呢？