【ESQ Nuts】如果你是Batman，搵邊個入正義聯盟好？

Anton

不用講，一定是無敵的埼玉老師 — 一拳超人。 大家有睇動畫版，會知道波羅斯最後使出足以毀滅地球的大絕「崩星咆哮炮」時，埼玉卻能夠用一拳「認真拳」把崩星咆哮炮打回去 ，網上指他的攻擊力至少相當於 418 億億個原子彈同時爆炸。重點是，《一拳超人》根本在講道理rather than去打怪，讓他加入「正義聯盟」除了有機會看他battle超人，應該可以幫DC的劇情挽回不少分數。

Park

我一定會揀衛斯理，黑白兩道外星人都要俾面佢，真係好有面子，同埋佢都算幾打得。

Connor

我會加Anne Hathaway 做Cat Woman ，因為鍾意睇佢著緊身衫，還有Cat Woman 同蝙蝠俠一早已經認識同合作，很順理成章地應該加入。

Stephanie

我會加《IQ博士》中的話梅超人。正義聯盟大家各有各性格，以我行我素為主，又「吱都唔笑」鬼咁認真，而且聯盟之中又點可以冇左超人？所以，話梅超人就是最適合的人選，沒有任何超能力的他，出去做宣傳、門面功夫，夠哂親和力，貼地又有喜感，幫正義聯盟加多D followers，多人支持他們就唔洗「小蝙」成日「拿口拿面」。平日英雄們打仗時，話梅超人又可自動做茶水部，等英雄們打到累累地可以休息嘆啖茶，再打過，Yeah。

Karen

咁有型嘅團隊，點少得一個Raw到攞條腸嚟勒死人嘅力王，High Tech vs How Tech，作為觀眾我會好期待。

Benjamin

我捱更抵夜苦練如來神掌咁多年，就係等呢個Moment，可以同咁多位超級英雄並肩作戰簡直係夢寐以求嘅事，重點係可以近距離欣賞神奇女俠嘅英姿，就算出場得半秒，已經畀荒狼揮斧頭嘅餘波震死咗，都值回票價。

Casper

家底厚過Batman（據福布斯推算，Batman身家為92億美元，馬雲為392億美元），幫手出錢造多幾架蝙蝠戰機戰車完全唔肉赤，至於功夫身手就真係打過先知。不過「新成員」馬雲最煞食之處不在於武功，而是他凝聚人心的力量。在金錢至上的娛圈，他能夠令一眾影星分毫不收客串《功守道》，領袖魅力非同凡舉！若果成功入 League，聯盟以後肯定和諧有愛無分你我，團結就是力量嘛。