【鄒凱光專欄】甚麼是基本的尊重？

剛過去的初三賀歲盃，決賽由中超球隊對日本聯賽球隊，中超隊一直佔盡優勢，最終以壓倒性贏波，但過程中一直被香港球迷喝倒彩，反熱烈地支持日本隊，老實說，如果香港人去到外地唐人街，當地華人就算唔係香港人，如果待你不周，而熱切款待日本人或其他西人，你會立刻拍低然後大大個題「支X人狗眼看人低，香港人唔好衰俾佢睇!」

將心比己，那隊中超之後有點過激的行為，其實都是無可厚非，我不是要說誰錯誰對，立場要站那邊？我只是想說有些原則還是要守， 就算是敵人，也應該有一份基本的尊重!

我經常夜歸，回到家裡泊車時，常常遇上一位操內地口音的洗車阿姨，佢最初笑容滿臉，以一個關注的態度替我抱不平：「你果間抹車好早就收工，你經常咁夜返，佢哋都無抹過你架車，你蝕晒底!」

我一笑置之，沒有回應，邊個賺蝕我又點會關心，更何況我兩三個月先醒起一次無交抹車費，人家無詐過我型，Super當打和啦！

之後我每晚夜歸，都遇到這位阿姨，佢開始變本加厲，由關注我抱不平變成攻擊對手進而力sell自己：「你愛車之人！架車唔清潔點出去見人，你大忙人，梗係夜返，我做通宵啱晒你!我知你唔係錢問題，你忙唔想煩……我可以幫你同你果間洗車講停用，你放心!我一定幫你停到，我好叻呢啲嘅……」

我同親朋提及這事，他們反應都極大:

「啲大陸人做嘢係咁x街!」、「你咪益啲大陸x」、「俾佢抹都得，半價囉！大陸人咁易搶我哋生意呀！」

我仍然相信人性原是潔白，是命運把善與惡填上，為口奔馳，永遠搵食都大晒!我理解的，我相信只是心急用錯方法推銷，但無論你怎樣說，我都只會先向原本的洗車公司質詢，若沒有改善，才選擇轉換第二間，但都不會揀那位阿嬸，因為就算她生活有多艱苦，你給我多個選擇就可以，強搶人飯碗，令人極其反感，不管你是那裡的人，有些原則還是要守，就算是敵人，也應該有一份基本的尊重！