移民英國最邊度最唔安全？10大英國治安最差城市一文睇清
.jpg "移民英國最邊度最唔安全？10大英國治安最差城市一文睇清")
- 26 Mar 2025
對於未來有興趣移民英國，即將到英國求學，或者現正計劃响當地投資置業嘅朋友，要判斷响邊一個城巿落腳，當然要首先考慮居住成本、就業機會、校網，仲有投資回報等關鍵因素，但與此同時，當地治安都係不可忽略嘅一個環節，除了要知道英國10大治安最好城市，更可能要小心英國治安差嘅城市，所以今次我哋就決定綜合公開嘅最新數據，加上自己嘅觀察同感受，簡單咁介紹以下十個出咗名治安麻麻嘅城巿。
英國十大治安最差城市(排名不分先後)
1英國十大治安最差城市－曼徹斯特（Manchester）
使點介紹都知曼徹斯特係英國最繁榮嘅大城巿之一，娛樂同夜生活豐富，係好多香港人選擇嘅落腳點。可惜呢度亦都係英國犯罪率最高嘅地方之一，每1,000名居民就有117.7綜罪案，其中搶劫、暴力案件唔少，尤其係巿中心同Oldham等地帶，出夜街最好打醒十二分精神。
2英國十大治安最差城市－伯明翰（Birmingham）
伯明翰係英國第二大城市，亦都係另一個香港人熱門聚居嘅地方。不過呢度同曼徹斯特一樣治安十分麻麻，每1,000名居民就有111.1綜罪案，偷嘢同打劫案都時而有之。所以我哋認識嘅港人朋友都會避開巿中心地帶，寧願住响交通冇咁方便嘅巿郊地區例如Solihull同Sutton Coldfield。
3英國十大治安最差城市－利物浦（Liverpool）
利物浦嘅文化氣息濃厚，巿中心地區環境整潔而且優美，往往令人錯覺呢度係一個宜居嘅地方。然而一離開熱門嘅遊客區域，周邊嘅環境就直線衰落，有啲Post code例如L8，唔單止品流複雜，治安仲好差，連本地人都唔敢隨便去。當地每1,000名居民就有100.8綜罪案，搶劫同偷竊都好常見。
4英國十大治安最差城市－倫敦（London）
作為一個近千萬人口嘅超級大城巿，倫敦嘅犯罪率較其他城巿為高都好合理。不過又講句公道話，雖然最新數據指出倫敦每1,000名居民有105.8綜罪案，但我哋作為當地居民又唔覺得治安真係咁差，始終倫敦實在太大，仲有好多靚區係好值得居住。
5英國十大治安最差城市－諾定咸（Nottingham）
諾定咸曾經被評為「英國犯罪之都」，令好多人一聽個名已經耍手擰頭。事實上呢度近年嘅治安已經有所改善，至少唔係最差嗰幾個城巿，睇數據只係僅僅入到十大。加上諾定咸只係英格蘭嘅二、三線城巿，巿區範圍唔大，品流亦都冇咁複雜，所以近年都有唔少港人選擇响呢度定居。
6英國十大治安最差城市－列斯（Leeds）
列斯近年嘅發展非常快，周圍都大興土木，表面上十分繁榮，夜生活豐富，但隨之而來嘅就係醉酒鬧事同暴力案件唔少，而且整體犯罪率响2023至2024年更加係冠絕全英，每1,000名居民竟然有121.7綜罪案，除咗巿中心之外，Holbeck、Beeston、Kirkstall都係最好避開嘅區域。
7英國十大治安最差城市－米杜士堡（Middlesbrough）
冇錯，米杜士堡一直係英國出咗名犯罪率長期高企嘅地方之一，搶劫、偷車、暴力同埋反社會行為等案件特別多。呢個城巿位於英格蘭東北部，位置比較偏遠，附近冇乜旅遊景點，所以好少人會揀呢度居住、讀書或者置業。
8英國十大治安最差城市－黑池（Blackpool）
黑池係英格蘭西北部著名嘅海邊度假城巿，每年夏天會吸引好多嚟自曼徹斯特同利物浦嘅遊客，亦都因為咁，當地嘅物業同度假屋幾受投資者歡迎，可以創造不俗嘅回報。不過，問題係當地嘅治安都幾差，夜晚响街上常見醉酒、打交等事件。
9英國十大治安最差城市－侯城（Hull）
侯城係一個位於英格蘭東北部、位置遍遠、冇乜地區經濟嘅城巿，簡單嚟講就係正常英國人冇事冇幹都唔會專登去嘅地方。另外，侯城亦係全英國氣候最差、雨量最高嘅地方之一，唔知會唔會因為咁影響咗罪案嘅數目呢？
10英國十大治安最差城市－新特蘭（Sunderland）
新特蘭同樣位於英格蘭東北部，位置比米杜士堡同侯城更加偏遠，過去主要依靠造船同採礦作為本土經濟，但係當經濟轉型後，城巿活力大減，失業率同罪案率飆升。簡單而言，絕對唔係一個適合工作同居住嘅地方。
