【移民英國住邊好？】英國10大治安最好城市大比拼！哪個地方最安全？
- 26 Mar 2025
香港人移民英國，揀落腳點居住地，首要考慮工作、教育以至安全問題，其實除倫敦、曼徹斯特、列斯同利物浦等熱門落腳點之外，英國仲有好多就業機會唔錯、治安較好，同埋居住環境理想嘅二、三線城巿。睇完今次嘅介紹之後，或者會令你對英國單一嘅負面印象有所改觀。
英國十大治安最好城市(排名不分先後)
1英國10大治安最好城市－愛丁堡（Edinburgh）
愛丁堡係蘇格蘭首府，唔單止風景靚，擁有知名嘅愛丁堡大學，治安原來仲十分好！單身女性朋友表示，呢度遊客區同住宅區都幾安全，夜晚出街都唔使驚。2023年數據顯示，當地暴力犯罪比倫敦低67%。
2英國10大治安最好城市－約克（York）
約克係一位於英格蘭西北部充滿歷史建築同優美風景嘅古城，多數人遊覽過之後都讚不絕口。作為熱門嘅旅遊城巿，當地嘅犯罪率仍然維持响低水平，所以最啱鍾意歷史感同寧靜生活嘅人，或者退休人士定居。
3英國10大治安最好城市－巴斯（Bath）
巴斯唔單止係著名嘅大學城巿，擁有著名嘅巴斯大學，仲係好受歡迎嘅旅遊勝地。雖然巿中心相當繁忙，假日時人頭湧湧，但係當地治安好到連偷嘢都少，係退休同讀書嘅好地方。
4英國10大治安最好城市－劍橋（Cambridge）
全球著名嘅大學城，亦以風光景色優美而聞名，治安當然亦都唔差得去邊啦！雖然劍橋嘅租金同生活費出咗名貴，因為住响當地嘅多數都係學生同專業人士，所以換嚟嘅就係唔使擔心治安同罪案問題。
5英國10大治安最好城市－牛津（Oxford）
同劍橋一樣，因為擁有全球知名的高上學府，牛津嘅學術同文化氣息濃厚，居民多數都係學生同專業人士，呢度同時亦都係旅遊勝地。不過同劍橋一樣，雖然牛津擁有較低嘅犯罪率，缺點就係租金同生活成本偏高。
6英國10大治安最好城市－布里斯托（Bristol）
布里斯托昔日係工業城巿，但而家已經轉型同發展成為文化之都，同時治安相當唔錯，定居於當地嘅港人朋友表示一直都住得好放心，環境比倫敦等大城巿安靜、簡樸。不過，有啲區域都係比較rough，夜晚唔好亂去。
7英國10大治安最好城市－雷丁（Reading）
雷丁嘅優點係地埋上好近倫敦，樓價比倫敦略低，但係居住空間同環境就更勝一籌，而且治安好，比較適合家庭居住。我哋都認識一啲响倫敦返工嘅專業人士，寧願每日搭火車通勤都要住响雷丁。
8英國10大治安最好城市－修咸頓（Southampton）
部份香港人移居英國後，表示唔習慣好難見到個海，所以先會揀修咸頓落腳。呢度係一個風景美麗嘅港口城市，距離倫敦唔算太遠，加上氣候和暖，犯罪率偏低，好適合家庭同學生居住。
9英國10大治安最好城市－普利茅斯（Plymouth）
普利茅斯係英國著名嘅軍事港口，長年有海軍駐守，所以治安管理嚴格，犯罪率亦偏低，好少聽過關於呢個城巿嘅嚴重罪案新聞。不過普利茅斯地理上位於英格蘭西南面，要去其他城巿就就唔太方便。
10英國10大治安最好城市－諾域治（Norwich）
諾域治係位於英格蘭東部嘅城巿，附近冇咩嘢出名，民風純樸，治安良好，連警察都話「冇咩大案件」。當然用另一個角度介紹，諾域治始終係鄉下小鎮一個，不過就打破咗一般人認為「經濟差嘅地方治安一定唔好」嘅普遍觀念。
介紹完以上十個咁正嘅地方，你哋又會唔會重新考慮自己嘅永久定居地呢？
