【收市閒情】－銀行執笠風暴七大離奇－千頌C

3月份，只係短短11日，可離奇地有4間銀行倒閉。打頭陣先有3間銀行執笠，Silvergate、矽谷銀行、Signature Bank；最新有167年歷史嘅瑞信，一個weekend之後，就監平監賤賣俾對手瑞銀。有幾平有幾賤？總數30億瑞郎（30.25億美元），每股瑞信股份0.76瑞郎，係上周五收市價嘅四折。當然，瑞銀唔會用錢交易，而係用股份交易。

今次事件最令投資者震撼嘅係，170億美元嘅CoCo bond，又稱為AT1，將全數write-off，債券持有人投資一夜蒸發清零；相反，股東衰衰地都仲可以收到30億瑞郎。稍為讀過finance嘅人都知，正常要清盤嘅話，分錢時買債券嘅人，分錢次序係優先過股東，股東一定係第一個去承受損失，但瑞銀個case係買債嘅要揹晒，而股東仲有錢分，完全顛覆市場認知。

呢件事離奇嘅程度，係連瑞信自己都冇諗過會咁發展。瑞信上星期同投資者present時先提過，如果銀行出現任何resolution process，股東一定會比AT1持有人更先蒙受損失，點知出到嚟係AT1被殺至片甲不留，連瑞信都唔知瑞士政府可以有創意到呢個程度。

係呀，雖然成壇嘢擺明係益瑞銀，等佢食瑞信時唔會消化不良，但瑞銀於記者會上面講明，呢條橋係來自瑞士政府手筆！

據路透引述專家指，其實瑞信AT1份發行章程，係有寫明瑞士監管機構「may not be required to follow any order of priority」，即是話佢咁做係合法！專家仲話：「It was clear in the prospectus but people hadn’t read it.」結果，瑞士就親手屠殺所有AT1持有人，造就呢單史上最大型嘅AT1血案。
 

AT1發行同持有人，喺無預警，火燒連環船之下成為大輸家：「What？依家政府可以一句說話，令瑞信AT1一夜就淪為廢紙，咁其他機構發行啲AT1點算？」

雖然歐盟監管部門同英倫銀行星期一都出聲：「我保證他日一旦出現銀行危機時，我哋會跟規矩，AT1投資者會排先過股東，大家唔使驚。」試圖定軍心，不過邊有咁易，德銀、滙控、瑞銀、法巴嘅AT1孳息爆升，倫敦上市追蹤AT1嘅etf，周一暴跌16％。今次輸嘅唔止係Credit Suisse，更加係swiss嘅credit，同埋係大家對AT1嘅信心。

AT1，即係CoCo bond英文全名係contingent convertible bonds，係2018年金融海嘯後嘅產物。佢本身係債券，但當銀行資本水平低過要求時，就會轉換成股權，甚至被完全撇帳。當銀行就快要出事啦，佢就係一個緩衝，減低bailout機會。 諷刺嘅係，本來佢只係做緩衝，依家變咗做前鋒。

HSBC上星期一以1英鎊接收矽谷銀行英國子公司，HSBC英國CEO Ian Stuart近日接受訪問時講，「之前如果有人同我講，我哋要在兩至三天內收購另一間銀行，我都唔會信。」結果HSBC星期六英國約佢傾刁，之後只係用咗5個鐘，就完成due diligence，星期一凌晨成刁。

至於瑞銀食瑞信，最早係上周四傳出瑞士政府想兩間銀行「長期合作」，然後星期日成刁，真係nothing is impossible。以後啲同事做嘢慢，幾日都交唔到貨，可以同佢講：搞幾日咁耐，銀行都收購到啦！