【葉浩文專欄】理財第一法則，齋儲錢係幫唔到你脫貧，咁可以點？

又有另一批後生仔，佢地都有儲蓄嘅習慣，但大多數都係所謂嘅Target Saving族，即係用旅行、買車，結婚等等為儲錢終極目標。但結果，好多時都會當儲到一筆錢之後，做到、買到想要嘅嘢之後，好快又會一筆清袋。而講到投資，大部分受訪後生仔更覺得，錢都唔夠洗，仲點樣去投資？

首先，我認為單純Target Saving唔係儲蓄嘅最好方法，特別係啱啱出嚟做嘢嘅後生仔。可以嘗試用八二或七三比例，用較大比例嘅儲錢去達成自己嘅願望或者諗法，而較小比例就用嚟錢搵錢。 點解要咁做？就係理財第一個重要法則：「任何時候都唔可以令自己冇曬錢！」因為冇本金，即使遇到幾好嘅投資機會、即使有一日樓價大跌一半，其實都係唔關你事。

你可能會話，我搵錢唔多，得咁少錢嚟投資又有乜嘢意思，卜中場波膽感覺仲high。但好多嘢都係比較出黎，本金一千變兩千蚊，你冇乜感覺；但如果十萬變二十萬，我諗你就會覺得好唔同。所以我哋應該趁後生，盡快將我哋少少嘅本金，好似滾雪球一樣，喺可控風險之下盡快將佢滾大。可以試下攞部計數機呢撳下，一項投資，每年畀你賺5%，十年你嘅投資升咗幾多呢？1.05x1.05乘10次，係62.8%！所以睇嚟好微不足道嘅回報，一啲你覺得冇乜感覺嘅投資，都會變成一個可觀嘅回報。

如果可以Back to the Future，係我啱啱畢業嘅時候有人俾呢篇文章我睇，我諗我會更早可以做到財務自由。人越大責任越大，你可能會結婚生仔，甚至有年老嘅父母要養，呢個時候你可能更難去儲蓄。最容易儲錢嘅時候反而係後生嘅時候，因為你需要負責嘅嘢唔多，搵到嘅薪金可以比自己去吃和歡樂，咁不如係呢一部分度攞少少出黎做儲蓄，等未來嘅自己冇咁辛苦咪更好。

其實好多人都覺得香港人死做爛做，壽命仲越黎越長，到退休年齡都冇得退休，咁點解唔早少少用正確嘅投資理念，等自己可以儘快財務自由，早日係自己理想嘅地方做自己鐘意做嘅事呢？即使係長命百歲，都要有足夠嘅資產先可以活得自在。其實講咁多你有冇留意到，時間就係投資最重要嘅元素，越係後生，你就越有本錢去開始。

（以上評論為作者個人意見，並不代表本網站立場。投資者須注意投資涉及風險，價格可升可跌甚至變成毫無價值。投資者在作出任何投資決定前，應詳細閱讀有關之風險披露聲明及相關文件。）